Хятадын их сургуулийн оюутнууд захирлаа 30 цагийн турш барьцаалжээ

БНХАУ-ын Жиансу мужийн Наньжингийн их сургуулийг мэргэжлийн сургуультай нэгтгэх төлөвлөгөөг эсэргүүцсэн оюутнууд жагсаал зохион байгуулан, сургуулийн захирлаа 30 гаруй цагийн турш барьцаалжээ.

Мэргэжлийн сургуулиуд тус улсад нэр хүнд багатай байдаг тул оюутнууд өөрсдийн их сургуулийн дипломоо үнэ цэнгүй болно гэж эмээж байгаа аж. Тус их сургуулийн кампус дээр өрнөсөн эсэргүүцлийн жагсаалын үеэр цагдаа нар оюутнуудыг бороохойгоор цохин, нулимс асгаруулагч хийгээр шүршсэн гэх мэдээлэл байгаа юм.

Данян хотын цагдаагийн газрын мэдээлснээр Наньжингийн их сургуулийн Жөнбей коллежийн оюутнууд өнгөрөгч ням гарагаас эхлэн кампус дээрээ цугларах болсон бөгөөд 55 настай захирлаа 30 гаруй цагийн турш барьцаалан, явуулаагүй байна. Албаныхан хоёр сургуулийг нэгтгэх төлөвлөгөөг цуцалсан болохыг мэдэгдсэн хэдий ч оюутнууд захирлаа явуулаагүй бөгөөд түүнийг хэл амаар доромжлон, хууль сахиулах байгууллагын алба хаагчдыг хаан, нэвтрүүлээгүй гэж эх сурвалжууд тэмдэглэжээ.

Цагдаагийн байгууллагын мэдэгдэлд "Их сургуулийн кампусын дүрэм журмыг сахиулах үүднээс олон нийтийн аюулгүй байдлыг хангах байгууллагууд хуулийн дагуу шаардлагатай арга хэмжээг аван, барьцаалагдсан хүнийг суллаж, шархадсан иргэдийг эмнэлэгт яаралтай хүргэсэн" хэмээн бичжээ. Гэвч олон нийтийн сүлжээгээр тархсан бичлэгүүдээс харахад цагдаа нар хэдэн мянган оюутныг хүрээлэн зогссон байсан бөгөөд тэднийг олны дундаас чирч гарган, араас нь хөөж байсан юм.

Уг явдлаас хойш Жиансугийн өөр бусад зургаан их сургууль мэргэжлийн сургуультай нэгдэх төлөвлөгөөгөө зогсоохоо мэдэгдсэн байна.

Тус мужийн Боловсролын газар өмнө нь энэхүү төлөвлөгөөг Хятадын Боловсролын яамны удирдамжийн дагуу хэрэгжүүлж байгаа гэж мэдэгдээд байсан билээ. Гэвч үүний улмаас тус мужийн дөрвөн их сургуульд сүүлийн өдрүүдэд эсэргүүцлийн жагсаал дэгджээ.

Эх сурвалж: BBC