Нохойныхоо эмчилгээний зардлыг төлөхөөр "Покемон"-ы цуглуулгаа заржээ

АНУ-ын Виржиниа мужийн оршин суугч Брайсон Климан нохойныхоо эмчилгээний зардалд мөнгө цуглуулахаар өөрийн "Покемон" картын цуглуулгаа заржээ.

Найман настай Брайсон нь дөрвөн настайгаасаа хойш "Покемон" картууд цуглуулж эхэлсэн бөгөөд энэ нь түүний хамгийн их нандигнадаг эд зүйл аж. Гэвч түүний дөрвөн сартай гөлөг Брюс үхлийн аюултай вирусийн халдвар авсан болох нь тогтоогдоход тэрээр гэрийнхээ урд талын зүлэг дээр ширээ засан, хөзрийн цуглуулгаа зарж эхэлсэн байна.

Брайсон хүү энэ талаар "Брюс өвдсөн бөгөөд түүнд миний тусламж хэрэгтэй болсон. Надад маш их гунигтай байсан бөгөөд би хамгийн сайн найзаа алдахыг хүсээгүй" хэмээн "Вашингтон Пост" сонинд ярьжээ. 

Түүний нохой нь "Парво" хэмээх вирустэй болох нь оношлогдсон бөгөөд эмчилгээний зардалд нь дор хаяж 655 ам.доллар шаардлагатай болсон аж. Гэвч Климаны гэр бүл үүнийг төлөх боломжгүй байсан ба эцэг, эх нь энэ талаар ярьж байгааг сонссон Брайсон ийнхүү өөрөө мөнгө олохоор шийджээ.

Азаар, олон хөрш нь түүний цуглуулгыг сонирхож эхэлсэн байна. Зарим хүмүүс хүүгийн цуглуулгаас худалдаж авалгүй, зүгээр л 20 ам.доллар үлдээгээд явж байсан аж. Брайсоны эцэг, эх нь мөн хандив цуглуулах цахим аян зохион байгуулсан бөгөөд удалгүй 5,000 гаруй ам.долларын хандив хүлээн авсан байна.

Ингээд бяцхан Брюс хагалгаандаа амжилттай орсон бөгөөд буцаад сэргэлэн цовоо нохой болсон хэмээн Климаны гэр бүл мэдээлжээ. Харин "Покемон" компаниас Брайсонд алдсан картуудыг нь илгээж, цуглуулгаа дахин бүтэн болгоход нь тусалсан гэнэ. Тэд мөн хүүд ховор картууд ч илгээжээ. 

Эх сурвалж: New York Daily News, Complex