Бүх насаараа хуримтлуулсан мөнгөө амьдардаг хотдоо хандивлажээ

Японы Канагава мужийн Ёкосука хотын оршин суугч өндөр настай эрэгтэй бүх насаараа хуримтлуулсан хадгаламжийн мөнгөө тус хотод хандивлажээ.

Тус ахмад настан энэ сарын дундуур Ёкосука хотын захиргааны танхимд орж ирээд, нэгэн үүргэвчийг Хотын даргад өгөхийг хүссэн гэж түүнтэй уулзсан албаны хүн мэдээлсэн байна. Үүний дараагаар албаныхан тус үүргэвч дотроос 60 сая иен (ойролцоогоор 1.5 тэрбум төгрөг) болон нэг захидал олжээ.

Уг захидалд "Энэ бол миний нэгдүгээр ангиасаа хойш хуримтлуулсан мөнгө. Үүнийг сайн үйлсэд ашиглаарай. Энэ бол хандив" хэмээн бичсэн байжээ.

Хандив өгсөн эрэгтэй нь 70-80 орчим насны харагдаж байсан бөгөөд нэрээ нууцлахыг хүссэн гэж Ёкосука хотын захиргаанаас тэмдэглэсэн байна. Хотын дарга Кацуаки Камижи цар тахлын хүнд хэцүү үед энэхүү хандивыг хүлээж авсандаа үнэхээр их гайхаж, сэтгэл нь хөдөлсөн гэдгээ албан ёсны мэдэгдэлдээ дурджээ. Тэрээр "Надад хэлэх ч үг алга. Үнэхээр их талархаж байна" хэмээсэн байна.

Япон улсад нэрээ нууцалсан хүмүүс хандив өргөх нь тийм ч ховор тохиолдол биш аж. Өнгөрсөн жил Нара хотын захиргааны танхимд нэг хүн 30 сая иен бэлэн мөнгөтэй цүнх үлдээгээд явсан байна. Тэрээр мөн захидал бичсэн байсан бөгөөд хандивласан мөнгөө ядуу буурай хүмүүст тусалж, боловсролын санхүүжилтэд зарцуулахыг хүссэн байжээ.

Эх сурвалж: Japan Today