? LIVE: Дэн буудлын үйл ажиллагаа эрхлэгчид: Цар тахлыг ашиглаад дэн буудлуудыг зах зээлээс шахаж байна

УОК-оос дэн буудлын үйлчилгээг нээх шийдвэр гаргасан байхад Нийслэлийн Засаг дарга Д.Сумъяабазарын зүгээс дэн буудлын үйл ажиллагааг нээхгүй гэдэг захирамж гаргажээ. Энэ нь дэн буудлын үйл ажиллагаа эрхлэгчдэд нэлээдгүй хүндрэл учруулж байгаа аж.

Дэн буудлын үйл ажиллагаа эрхлэгч Б.Батболд:

Нийслэлийн онцгой комисс шударга бус шийдвэр гаргалаа. Үүнд бид маш бухимдалтай байна. Дэн буудал, зочид буудал хоёр ижилхэн үйлчилгээ явуулдаг. Гэтэл зочид буудлын үйл ажиллагааг нээсэн мөртлөө дэн буудлыг нь хаасанд бид бухимдаж байна. Дэн буудлын үйлчилгээ эрхлэгчид сүүлийн хоёр жилийн турш үйл ажиллагаа явуулж чадсангүй. Тун удахгүй хил нээхээр маш олон жуулчид ирнэ. Тэдний буудаллаж байрлах газар нь дэн буудал байдаг. Гадаадын жуулчид томоохон сүлжээ зочид буудалд бус хямдхан дэн буудалд буухыг илүүд үздэг. Би энэ үйлдлийг хэрхэн үзэж байна вэ гэхээр хувьдаа зочид буудалтай дарга нар өөрсдийнхөө бизнесийг дэмжихийн тулд л бидний үйл ажиллагаа хязгаарлаж байна хэмээн бид хардаж байгаа.

Бид дэн буудлын үйл ажиллагааг нээнэ гэсэн мэдээг авсан даруйдаа чихэндээ байгаа ээмгээ ломбардаж байгаад дэн буудлынхаа цэвэрлэгээ үйлчилгээг хийж, ажилтан алба хаагчдаа цуглуулан вакцинжуулах зэрэг олон ажлыг хийсэн. Гэтэл яг үйл ажиллагаагаа нээх гэтэл хориглочихлоо.

Дэн буудалд архи зардаггүй, дэн буудалд архидалт болдоггүй. Гэтэл бидний үйл ажиллагааг хааж зочид буудлыг нээсэнд гомдолтой байна.

Дэн буудлын үйлчилгээ эрхлэгч Гэрэлмаа:

Бид төр засгийнхаа гаргасан шийдвэрийг чанд биелүүлж, өнгөрсөн хоёр жилийн турш алдагдал хүлээж хаалгаа хаасан. Тавдугаар сарын 22-ны өдөр үйл ажиллагааг нээнэ гэж хэлмэгц нь нэг удаагийн хэрэгслэлээ базааж, интернет утсаа нээж, ариутгал цэвэрлэгээгээ хийж бүх бэлтгэлээ базаачихсан байхад үйл ажиллагааг нь нээхгүй гэсэнд гомдолтой байна.

Манай дэн буудалд цөөнгүй хүн ажилладаг. Тэдний орлого ашиг хүртэл тасалдаж байна. Бид 6-7 айлын аж амьдралыг залгуулж явдаг хүмүүс ш дээ.