Энэтхэг улс юун дээр алдав

Дэлхий даяар коронавируст цар тахал тархсанаас хойш жил гарны хугацаа өнгөрлөө. Өнгөрсөн хугацаанд цар тахлын тархалт харьцангуй тогтвортой байсан Энэтхэг улсад сүүлийн саруудад бөмбөг дэлбэлсэн мэт халдварын тохиолдол өсч, дэлхийн нийтийн анхаарлын төвд ороод байна.

Ганга мөрөнд биеэ угаадаг хинду шашны баяр, улс төрийн сонгуультай холбоотой жагсаал цуглаан зэрэг нь халдварын тархалтыг огцом ихсэхэд нөлөөлсөн гэж шинжээчид харж байна. Пүрэв гарагт л гэхэд хоногт 412,262 шинэ тохиолдол бүртгэгдэж, 3,980 хүн нас барсан нь итгэмээргүй тоо баримт боловч үнэн хэрэгтээ албан ёсны тоо баримтад дурдагдаагүй үүнээс ч олон хүн халдвар авч, амь насаа алдаж байгаа хэмээн таамаглаж байгаа юм.

Энэтхэгийн эрх баригчид чухам ямар алдаа гаргаснаас 1,3 тэрбум иргэнээ айдаст автуулсныг шинжээчид дүгнэжээ...

Ерөнхий сайд Нарендра Модигийн Засгийн газар өнгөрсөн жилийн гуравдугаар сард буюу цар тахал тархаж эхэлсэн даруйд үйлдвэр, сургууль, албан газар, дэлгүүрүүдийг хааж, дотоодын болон олон улсын нислэгүүдийг бүрэн зогсоож, бүхэлдээ хөл хорионы дэглэмд шилжсэн.

Үүний дүнд хамгийн оргил үедээ буюу 2020 оны есдүгээр сард хоногт дээд тал нь 100,000 шинэ тохиолдол бүртгэгдсэн юм. Улмаар халдварын тархалт аажмаар буурч, энэ жилийн нэг, хоёрдугаар саруудад хамгийн бага түвшинд хүрсэн.

Ерөнхий сайд Моди энэ оны нэгдүгээр сарын сүүлчээр Энэтхэг улс цар тахлыг даван гарч чадсанаар хөнөөлт вирусээс аврагдлаа хэмээн мэдэгдэл хийжээ. Энэ л тэдний хамгийн том алдаа байв. Учир нь Засгийн газар цар тахлын хоёр дахь давлагаа ирж буйг умартан, хэтэрхий эрт баяраа тэмдэглэсэн бололтой.

Коронавирусийг намжаасан ялалтаа тэмдэглэж эхэлсний дараа ард иргэд хамгаалалтын дүрэм журмаа баримтлахаа больж, амны хаалтаа тайлан, зай барихаа болив. Эдгээр хүмүүсийн тоонд Модигийн Засгийн газрын сайдууд ч багтаж, амны хаалт зүүх дүрмийг баримтлахаас татгалзаж, сонгуулийн өмнөх кампанит ажлынхаа хүрээнд олон нийтийн цугларалт арга хэмжээг урьдчилан сэргийлэлгүй ил задгай зохион байгуулжээ.

Сонгуулийн кампанит ажлаас гадна дөрөвдүгээр сарын эхэнд хинду шашны хамгийн том баяр Кумбх Мелаг тэмдэглэж олон сая иргэн Ганга мөрний усанд биеэ угаасан байна. Үүний дараа удалгүй коронавирусийн мутацид орж хувирсан вирус хурдацтай тархаж, хоёр дахь давлагаа богино хугацаанд халдварын тохиолдлыг 20 сая давуулжээ. Өөрөөр хэлбэл сүүлийн гурван сарын хугацаанд тус улсын 20 сая иргэн халдвар авсан байна.

Тус улсад эрүүл мэндийн тогтолцоо нурж, шинжилгээ, эм бэлдмэл, эмнэлгийн ор бүхэлдээ хомсодсон бадалтай байна. Хүчилтөрөгчийн хангамж, тусгаарлах байр хаанаа ч хүрэлцэхгүй байгаа ажээ. Вакцинжуулалт хийж байгаа ч хүн амын ердөө 0,15 хувийг нэг хоногт вакцинжуулах хүчин чадалтай байна.

Эх сурвалж: New York Post