Украин улс ОХУ-ын хил дагуу 400 км урт шуудуу ухжээ
Украин улс ОХУ-тай хиллэх хэсгийн дагуу 400 орчим км-ийн урттай танк эсэргүүцэх шуудуу ухсан гэж тус улсын Хил хамгаалалтын албаны тэргүүн Сергей Дейнеко мэдэгджээ.
"Хана" хэмээн нэрлэсэн энэхүү төслийн хүрээнд 400 орчим км урт танк эсэргүүцэгч шуудуу, 330 км зэрэгцээ зам болон 100 км төмөр хашаа барин, 70 км үргэлжилсэн өргөст торон хашааг байрлуулсан байна. Уг бэхлэлтийн ажил нь Харков мужид дуусах шатандаа орсон бөгөөд Чернигов мужид хурдацтай урагшилж байгаа аж.
Тус инженерийн зохицуулалтаар Украин улсын хилийн шугамыг 100 хувь хянах бөгөөд хорлон сүйтгэх бүлэг, хүсээгүй этгээдүүд, хууль бусаар хил нэвтрэгчдээс урьдчилан сэргийлэх зорилготой болохыг Сергей Дейнеко онцолжээ.
Анх тус төслийн зардлыг ойролцоогоор 143 сая ам.доллароор тооцож байсан хэдий ч төсвийг 90 орчим сая ам.доллар болгож танасан байна. Украины Ерөнхий сайд асан Арсений Яценюк анх 2014 онд ОХУ-тай хил залгаа бүсэд 2,000 км урт бэхлэлтийн шугам босгох ажлыг санаачилсан аж. Уг ажлыг зургаан сарын хугацаанд багтааж дуусгах байсан боловч 2018 он хүртэл сунгасны дараа 2021 он болгоод байсан бөгөөд эцэст нь 2025 онд дуусгах зорилт тавьжээ.
Эх сурвалж: ТАСС, Известия
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.