Залуу боксчин тулааны үед авсан гэмтлийнхээ улмаас нас барлаа

Өнгөрөгч дөрөвдүгээр сарын 10-23-ны өдрүүдэд Польш улсын Кийлс хотноо сонирхогчдын боксын залуучуудын ДАШТ зохион байгуулагдсан билээ.

66 орны 486 тамирчин оролцсон тус тэмцээний эрэгтэйчүүдийн -81кг жинд тулалдсан Иорданы Рашид Аль-Свайсат тулааны үеэр тулааны үеэр хүнд цохилтод орж ухаан алдсан юм. Улмаар шууд эмнэлэгт хүргэгдэн тархины мэс засалд орсон ч 10 хоногийн дараа амьсгал хураасан байна. Тэмцээнийг зохион байгуулагч Сонирхогчдын боксын олон улсын холбооны зүгээс /AIBA/ дараах мэдэгдлийг гаргасан байна. "Иорданы шилдэг боксчин Рашед Аль-Свайзат маань 18-хан насандаа хорвоог орхилоо. Түүнд гэрэлт ирээдүй байсан нь дамжиггүй. Бид Рашедийн гэр бүл, найз нөхдийн нэгэн адил гашуудаж байна. Гүн эмгэнэл илэрхийлье" хэмээжээ.