Киргизийн хил дээрх мөргөлдөөний улмаас 13 иргэн амиа алджээ
Киргиз, Тажикистан хоёр улсын хил дээр өрнөсөн мөргөлдөөний улмаас амиа алдсан киргиз иргэдийн тоо 13 болж, 121 хүн шархадсан гэж тус улсын Эрүүл мэндийн яамны хэвлэлийн албанаас өнөөдөр мэдээлжээ.
Албаны хүний хэлснээр шархадсан 25 хүнийг тусгай үүргийн онгоцоор Баткен хотоос Бишкек рүү шилжүүлж, Киргизийн гэмтэл согог болон мэс заслын төв эмнэлгүүдэд хэвтүүлсэн байна. Хоёр хохирогчийн биеийн байдал хүнд байгаа бол үлдсэн иргэдийн биеийн байдал хүндэвтэр байгаа аж.
Киргиз, Тажикистаны хоорондох хилийн Баткен хэсгийн зөрчилдөөний талаар албаныхан энэ сарын 28-нд мэдээлсэн юм. Тажикистаны талаас цахилгааны шугамын шон дээр хяналтын камер суурилуулах гэж оролдоход Киргизийн талын иргэд шонгуудыг тайран унагажээ. Үүний дараагаар хоёр талаас бие бие рүүгээ чулуу шидэж эхэлсэн байна.
Пүрэв гарагийн шөнө гэхэд мөргөлдөөн улам даамжирч, буудалцаан эхэлжээ. Энэ үеэр Тажикистаны гурван иргэн болон Киргизийн гурван иргэн алагдаж, нийт хохирогчдын тоо 100 давжээ. Үүнээс хэдэн цагийн дараа хилийн хүчнүүд харилцан гал зогсоохоор тохиролцон, ухарсан байна.
Уг хоёр улсын хоорондох хил нь үе үе орон нутгийн иргэд болон хил хамгаалагчдын хоорондын зөрчилдөөний бүс болж хувирдаг билээ. Хилийн заагийг тодорхой зааж өгөөгүй нь мөргөлдөөний гол шалтгаан боолдог байна.
Эх сурвалж: Риа Новости
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.