Apple-ын шинэ бүтээгдэхүүнүүдтэй танилц

Apple компани бүтээгдэхүүн танилцуулах 2021 оны хамгийн эхний томоохон арга хэмжээгээ зохион байгууллаа. Apple-ын хэрэглэгчдийн хүлээж байсанчлан өөрсдийн үйлдвэрлэсэн М1 чип 5G сүлжээ бүхий iPad Pro, iMac-ын шинэ хувилбарууд, AirTag, Siri удирдлага бүхий 4K телевиз, нил ягаан өнгийн IPhone гар утас зэргийг танилцууллаа.

iPad Pro

iPad Pro 5G сүлжээ болон өмнөх хувилбаруудаасаа илүү хурдан үйлдлийн систем, Mini-LED дэлгэцтэй болон эргэн иржээ. Apple компанийн үйлдвэрлэсэн М1 чипийг суурилуулсан нь видео эффект, график дизайн зэрэг олон талын үзүүлэлтийг сайжруулсан байна. Видео дуудлага, уулзалтын үеэр хүмүүсийн оролцож байгаа тооноос хамааран автоматаар дэлгэцээ томруулах, жижгэрүүлэх үйлдэл ч багтжээ. Урьдчилсан захиалгыг дөрөвдүгээр сарын 30-ны өдрөөс эхлэн авах ба 799 ам.долларын үнэтэй байна.

iMac

Apple компани ойрын жилүүдэд ажлын ширээнд зориулсан iMac компьютеруудаа шинэчлээгүй байсан бол энэ удаад М1 чип бүхий цоо шинэ хувилбарыг танилцууллаа. Илүү ухаалаг болсны дээр авсаархан болжээ. 24 инчийн 4,5К нягтаршилтай, 11,3 сая пикселийн дэлгэцтэй ба долоон өнгөний сонгололттой үйлдвэрлэгдсэн байна. Илүү хурдтай болсны дээр iPhone гар утсан дээр ашигладаг аппликейшнуудыг ч суулгаж өгсөн байна. Цар тахалтай холбоотойгоор хэрэглэгчид гэрээсээ ажиллах шаардлага нэмэгдсэнийг харгалзан камерыг нь сайжруулж, өнгө, дууны тэнцвэрийг чухалчилжээ. Тавдугаар сарын хоёрдугаар хагасаас захиалга авах ба дөрвөн үндсэн өнгө нь 1,299 ам.доллар, нэмэлт гурван өнгөний сонголттой нь 1,499 ам.доллараар зарагдана.

AirTag

Bluetooth байршил тогтоогч бүхий AirTag нь Apple-ын хэрэглэгчдийн дунд хэдийнээ хүлээлт үүсгээд байсан бүтээгдэхүүн юм. Таг, товчлуур хэлбэртэй бяцхан төхөөрөмж таныг түлхүүр, хэтэвч, компьютер, гар утас, iPad цаашлаад машиныхаа байршлыг тогтооход ч тусална. Find My app болон Siri-ээр холбогдоход л хангалттай ажээ. Ган төмрөөр хийгдсэн тул ус, шороонд тэсвэртэй. Apple-ын үйлдвэрлэсэн U1 чипийг суурилуулсан ба 2019 онд үйлдвэрлэсэн iPhone 11 загвар болон түүнээс хойш үйлдвэрлэсэн гар утас хэрэглэгчид ашиглах боломжтой байна. Дөрөвдүгээр сарын 30-ны өдрөөс урьдчилсан захиалга авна. Нэг ширхэг нь 29 ам.доллар, дөрөв нь 99 ам.долларын үнээр зарагдах ажээ. Мөн Hermes брэндтэй хамтран цүнх тээш, түлхүүрэнд зүүхэд зориулагдсан арьсан чимэглэлүүдийг гаргасан байна.

Шинэ Siri удирдлагатай Apple 4K TV

Технологийн шилдэг компанийн хэрэглэгчдэдээ зориулсан дараагийн бүтээл бол шинэ Siri алсын удирдлага болон Apple 4K телевиз юм. Шинэ удирдлагыг 100 хувь дахин боловсруулсан хөнгөн цагаанаар үйлдвэрлэсэн ба Siri товчлуурыг байршуулснаар хэрэглэхэд илүү хялбар болжээ. Ухаалаг удирдлага бүхий телевиз 179-199 ам.доллараар зарагдана.

Эцэст нь Apple кредит карт гэр бүлийн бүх гишүүнд зориулагдсан байхаар шинэчлэгдэн гарсан байна. Мөн подкаст хийх сонирхолтой хэрэглэгчдэдээ зориулан Apple Podcast Subscriptions, нил ягаан өнгөнд дурлагчдад зориулж iPhone 12, iPhone 12 mini гар утаснуудаа шинэ өнгөтэйгээр үйлдвэрлэжээ.

Түүнчлэн Apple-ын бүтээгдэхүүн хэрэглэгчид ирэх долоо хоногт iOS 14.5 цоо шинэ үйлдлийн системийг татаж аваарай!

Эх сурвалж: ВВС, CNN