Johnson & Johnson фирмийн үйлдвэрлэсэн коронавирусийн эсрэг вакциныг АНУ, Өмнөд Африк болон Европын холбоо дархлаажуулалтад ашиглаж байсан боловч цусны бүлэгнэл үүсгэж байгаа тохиолдлууд гарсан тул хэрэглэхээ түр зогсоогоод байна.

АНУ-ын хүнс, эм бэлдмэлийн газраас тус вакцины 6,8 сая тун тарисны дараа цусны бүлэгнэл үүссэн зургаан тохиолдол илэрсэн гэжээ. Энэ нь АстраЗенека фирмийн үйлдвэрлэсэн вакцинтай ижил төстэй шинж тэмдэг илэрсэн тохиолдол болж байна.

Европын Холбооны гишүүн улс орнууд энэ долоо хоногт Johnson & Johnson фирмийн вакциныг коронавирусийн эсрэг дархлаажуулалтад ашиглаж эхэлсэн боловч цус бүлэгнэсэн тохиолдлууд бүртгэгдсэний дараа зогсоолоо. FDA буюу АНУ-ын хүнс, эм бэлдмэлийн газрын мэдээлснээр Johnson & Johnson вакцин тариулсан нэг хүн цус бүлэгнэснээс болж нас барсан бол өөр нэг хүний биеийн байдал маш хүнд байна.

Цусны бүлэгнэл үүссэн зургаан тохиолдол 18-48 насны эмэгтэйчүүд байгаа юм. Тэдэнд вакцин хийлгэснээс хойш 6-13 хоногийн дараа хариу урвал болох цусны бүлэгнэл илэрчээ. 31 сая гаруй иргэн коронавирусийн халдвар авч, 562,000 иргэн нас бараад байгаа АНУ тус фирмийн вакцины аюулгүй байдлыг баталгаажуулах хүртэл холбооны, төрийн мэдлийн болон хувийн байгууллагууд хэрэглэхгүй байх шийдвэрийг гаргасан байна.

Johnson & Johnson нь АНУ-ын эрүүл мэндийн тусламж, тоног төхөөрөмжийн компани боловч коронавирусийн эсрэг вакцины хөгжүүлэлтийн ихэнх явцыг Бельги улсад гүйцэтгэжээ. Бусад вакцинуудтай харьцуулахад хоёр биш ердөө нэг тун хийлгэхэд дархлаа тогтох ба энгийн хөргүүрт хадгалах боломжтой тул алслагдсан бүс нутаг, холын улс орнууд руу тээвэрлэхэд тохиромжтой байна.

Эх сурвалж: ВВС

---