УИХ-ын даргын захирамжаар байгуулагдсан ажлын хэсгийн ахлагч, УИХ-ын гишүүн Б.Энх-Амгалан болон УИХ-ын гишүүн Ч.Ундрам нар Төрийн ордонд мэдээлэл хийлээ. Өмгөөлөгч Б.Баасанцогт болон ҮАБЗ-ийн ажилтнуудтай холбоотой хэрэг дээр мөрдөн шалгах ажиллагаа явагдаж байгаа аж. 

УИХ-ын гишүүн Б.Энх-Амгалан:

-Өмгөөлөгч Б.Баасанцогт шүүгч нарт нөлөөлсөн нь тогтоогдсон тул эрүүгийн хэрэг үүсгэн, шалгаж байгаа талаар АТГ-аас бидэнд мэдээлсэн. Хууль зүй, дотоод хэргийн сайд энэхүү хэрэг дээр онцгой анхааран ажиллаж байгаа талаар ажлын хэсэгт албан бичиг ирүүлсэн. 

ҮАБЗ-ийн ажилтнууд ОХУ руу зорчиж, Алтанбулгийн боомтоор орж ирэхдээ их хэмжээний ам.доллар авчирсан гэх мэдээллийг ТЕГ шалгаж байгаа талаар мөн мэдээлэл ирүүлсэн. 

Өмгөөлөгч Б.Баасанцогт Park view хотхонд биеэ үнэлэлт зохион байгуулсан гэх хэрэг, түүний гэрийн компьютерээс гэмт хэргийн схем гарч ирсэн зэрэг үйлдлийг АТГ дээр нэгтгэн шалгаж байна. 

Иймд олны анхааралд орж, хууль, шүүхийн байгууллагын нэр хүндийг унагаж байгаа энэ хэрэг хэрэгсэхгүй болгох, замхран алга болгохгүй байх дээр хэвлэл мэдээллийн байгууллагууд хамтран ажиллах хэрэгтэй байна. Хуулийн ажилтнуудын шударга бус үйлдлийг шударгаар шийдүүлье. 

УИХ-ын гишүүн Ч.Ундрам: 

-Хэвлэл мэдээллийн хэрэгслээр гарсан, хууль, шүүх, прокурорын байгууллагын ажилтнуудтай холбоотой 106 гомдол УЕПГ-т цуглаад байна. УИХ-ын даргын захирамжаар байгуулагдсан манай ажлын хэсэгт багагүй өргөдөл, гомдол ирсэн. Бизнесээ дээрэмдүүлсэн гэх иргэн Чингүүн, Билэгт, ДЭМ санхүүгийн нэгдлийн гомдлуудад өнөөх л өмгөөлөгч Б.Баасандорж, УЕП-ын орлогч С.Алиманцэцэг, Нийслэлийн прокурорын газрын ерөнхий прокурор Ш.Нямдорж, НПГ-ын орлогч асан Ц.Насанбат нар оролцсон байна. Бид энэхүү гомдлуудыг АТГ-г өгч шалгуулна. Хэрхэн шийдэгдэх явцын талаар байнга мэдээлэл авч, танилцуулах болно. 

---