Хонконгийн ардчиллын төлөөх хөдөлгөөний долоон удирдагч 2019 онд Засгийн газрын эсрэг томоохон эсэргүүцлийн жагсаалыг зохион байгуулж, оролцсон гэх хэргээр ял сонсжээ.
Тэдний дунд "Apple Daily" өдөр тутмын сэтгүүлийн эзэн Жимми Лай, Хонконгийн Ардчилсан намын үүсгэн байгуулагч Мартин Ли болон ардчиллын төлөө тэмцэгч таван хууль тогтоогч байгаа юм. Дүүргийн шүүгчийн гаргасан шийдвэрээр тэдэнд таван жил хүртэлх хугацаагаар хорих ял шийтгэл оноожээ.
Жимми Лай, Мартин Ли нар бусад дөрвөн шүүгдэгчийн хамт 2019 оны 8 дугаар сарын 18-нд "Виктория" цэцэрлэгт хүрээлэнгээс гарч явахдаа цагдаа нарыг шүүмжилж, шинэчлэл хийхийг шаардсан уриа лоозон барьж, хотын төвөөр эсэргүүцлийн жагсаалыг тэргүүлэн алхсан аж. Харин долоо дахь шүүгдэгч Маргарет Ие нь тэдэнтэй замаас нь нэгдэн, уриа лоозон барьж явахад нь тусалжээ.
.jpeg)
Тухайн өдөр Хонконгийн 1.7 сая хүн энэхүү жагсаалд оролцож, Хятадын Засгийн газрын эсрэг эсэргүүцлээ илэрхийлсэн гэж зохион байгуулагчид нь тооцоолсон юм.
Энэ хэрэгт холбогдсон есөн шүүгдэгчийн зургаа нь Хонконгоос гарахгүй гэсэн нөхцөлийн хүрээнд батлан даалтад гарсан бөгөөд аяллын бүх бичиг баримтаа хүлээлгэн өгөөд байгаа аж. Тэд энэ сарын 16-ны өдөр дахин шүүх хуралдаанд оролцож, ял хөнгөрүүлэх хүсэлтээ албан ёсоор гаргах байна.
Эх сурвалж: Associated Press
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.