Италийн мафийн гишүүн "YouTube" сувгаасаа болж баригджээ

Италийн цагдаа нарын долоон жилийн турш эрэн сурвалжилсан мафийн гишүүн Марк Ферен Клод Биарт өөрийн хоол хийх ур чадвараа харуулсан бичлэгүүдийг цахим ертөнц дээр байршуулснаар баригджээ.

53 настай Биарт өөрийн "YouTube" сувгаа нээн, хоол хийж буй бичлэгүүдээ байршуулж байсан бөгөөд цагдаа нар түүнийг шивээсээр нь танин, байршлыг нь олж тогтоосон байна. Хэдийгээр тэрээр бичлэгүүд дээрээ нүүрээ нуусан байсан ч биеийнхээ шивээсийг нуугаагүй байжээ. Биарт 2014 оноос хойш цагдаа нараас зугтан, нуугдан амьдарч байсан бөгөөд албаныхан түүнийг Нидерланд руу кокайн наймаалсан хэргээр эрэн сурвалжилж байсан юм.

Италийн "Ндрангета" мафийн бүлэглэлийн гишүүн гэж сэжиглэгдэж байгаа Биартыг өнгөрсөн долоо хоногийн лхагва гарагт Бүгд Найрамдах Доминикан Улсад баривчилсан бөгөөд одоо Итали руу шилжүүлээд байгаа аж. Биарт Доминикан Улсын Бока Чика хотод нуугдан, нам гүмхэн амьдарч байжээ.

"Ндрангета" мафийн бүлэглэл нь Европт орж ирж буй кокайны ихэнх хэсгийг хянадаг тул дэлхийн хамгийн хүчирхэг зохион байгуулалттай гэмт хэргийн бүлгүүдийн нэг гэж тооцогддог. Тус бүлэглэлийн гишүүд одоо Итали улсад сүүлийн хэдэн арван жилд тохиогоогүй хамгийн том мафийн холбогдолтой шүүх хурлын өмнө хариуцлага хүлээх болоод байгаа билээ. Албаныхан удаан хугацааны турш мөрдлөгийн үйл ажиллагаа явуулсны эцэст "Ндрангета" бүлэглэлийн нийт 355 гишүүнийг баривчлаад байгаа юм.

Шүүхийн урьдчилсан сонсголын үеэр бүх шүүгдэгчийн нэрийг уншихад гурван цаг гаруй хугацаа зарцуулсан байна. Тэд хүн амины хэрэг, хар тамхины наймаа, бусдыг сүрдүүлэн мөнгө авах, мөнгө угаах зэрэг хэрэгт буруутгагдаж байгаа юм. Шүүх хуралдаан энэ оны нэгдүгээр сард эхэлсэн бөгөөд нийт 900 гаруй гэрч нотлох баримт өгөх төлөвтэй байна.

Эх сурвалж: BBC