Мьянмарт 100 гаруй иргэн алагдсаны дараа цэргийн дарга нар баяр тэмдэглэв
Мьянмар улсад үргэлжилж байгаа төрийн эргэлтийг эсэргүүцсэн жагсаалын үеэр хоногт 114 хүн алагдсан байна. Хоёрдугаар сарын 1-нд төрийн эргэлт гарснаас хойш иргэд эсэргүүцлийн жагсаалд нэгдсэн бөгөөд өнөөдрийг хүртэл хоёр сар орчмын хугацаанд нийт 400 гаруй хүн аюулгүйн хүчнийхний гарт амь насаа алджээ.
Мьянмар улсад үүссэн нөхцөл байдлыг дэлхийн 10 гаруй улсын Батлан хамгаалахын сайд нар хурцаар шүүмжлэн буруутгасан. Хэдийгээр хоногт зуу гаруй хүн алагдсан аймшигт өдөр бямба гарагт тохиосон боловч цэргийн эргэлтийг удирдаж, төрийн эрхийг гартаа авсан Мин Аун Лайн генералуудын хамт зэвсэгт хүчний баярын өдрийг тэмдэглэж, гала концерт зохион байгуулжээ.
Ням гарагт иргэд олноороо оршуулга хийсэн боловч цэргүүд оршуулгыг саатуулахыг оролдсон гэж зарим эх сурвалж мэдээлсэн.
Өнгөрсөн бямба гарагийн орой Мьянмарын арми 1945 онд Японы эзлэн түрэмгийллийн эсрэг тэмцсэн өдрийг эргэн дурсаж, жил бүр уламжлал болон тэмдэглэдэг зэвсэгт хүчний өдрийг тэмдэглэн өнгөрүүлсэн байна. Төрийн мэдлийн сувгаар дүрэмт хувцастай цэргийн удирдагчид улаан хивсэн дээр инээмсэглэн алхаж, баярын зоогийн ширээний ард сууж байгааг харуулжээ. Энэ үйл явдлыг тэмцэгчид олон нийтийн цахим сүлжээгээр дамжуулан хурцаар шүүмжлэн буруутгасан байна.
Удирдагч Мин Аун Лайн цэргийн жагсаал зохион байгуулж үг хэлсэн ба баярын арга хэмжээнд Орос, Хятад, Энэтхэг, Пакистан, Бангладеш, Вьетнам, Лаос, Тайланд улсуудын төлөөлөгчид оролцжээ.
Эх сурвалж: ВВС
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.