Орон нутгийн эрх баригчид хөдөө тосгоны байшингаас учир битүүлгээр амиа алдсан зургаан хүний, ойролцоох гүүрэн доороос нэг хүний цогцос олсон байна. Хохирогчид дунд долоон настай охин байжээ.

Уг хэрэг Японы Миязаки мужийн Такачихо тосгонд болсон явдал юм. Энэ тосгон эртний Шинто хэв маягийг хадгалж үлдсэн тул аялагч жуулчид ихээр очдог байна.

Зургаан хүний цогцос олдсон байшингийн эзэн хохирогчдын нэг 72 настай Ясуо Ихоши бөгөөд гэрийнхэн нь түүн рүү утсаар залгахад хариу өгөөгүй гэнэ. Байшингийн гадна нэг эмэгтэй, дотор талд хоёр эмэгтэй, гурван эрэгтэй амиа алдсан байжээ. Орон нутгийн хэвлэл мэдээллийн хэрэгслийн дамжуулснаар хохирогчдыг хутгалж амь насыг нь бүрэлгэсэн ба гэмт хэрэг үйлдсэн зэвсэг олдоогүй байна.

 

 

Амиа алдсан хүмүүсийн дунд байшингийн эзэн Ясуо Ихоши болон түүний гэргий, ач охин, ач хүү, бэр нь байжээ. Хүүхдүүд, эмэгтэй байшингийн эзний хоёр дахь хүү Масахирогийн гэр бүл байсан ба цогцоснууд олдсоноос хойш Масахиро сураггүй алга болжээ.

Япон улсад нэг дор олон хүний амийг бүрэлгэсэн харгис хэрцгий гэмт хэрэг гарах нь тун ховор, дэлхийн хамгийн аюулгүй улс оронд багтдаг. Дэлхийн хоёрдугаар дайнаас хойш нэг дор олон хүний аминд хүрсэн хэрэг маш цөөхөн гарч байсан. 2016 онд Токио хотод 19 хүнийг хутгалж амь насыг нь хөнөөсөн гэмт хэрэг гарснаас хойш аялал жуулчлалын төв Такачихо тосгоны хэрэг дараагийнх нь болж байна.

 

Эх сурвалж: www.cnn.com

---