Фукушимагийн цөмийн бүсэд мартагдсан мууруудыг авардаг эр

Японы Фукушима цөмийн станцад арван жилийн өмнө осол гарахад Сакаэ Като хөршүүдийнхээ орхиод явсан мууруудыг аврахаар үлджээ. Тэрээр одоог хүртэл яваагүй байгаа юм.

Хорио цээр тогтоосон цацрагийн бохирдолтой бүсэд амьдардаг Като "Би эндхийн сүүлчийн муурыг асрахыг хүсэж байна. Тэрний дараа би үхэхийг хүсэж байна, ганц өдөр эсвэл цагийн дараа байсан ч хамаагүй" хэмээн ярьжээ. Тэрээр одоогоор гэртээ болон өөрийн эзэмшлийн хоосон барилга дотор нийт 41 муурыг тэжээж байгаа бөгөөд өнөөг хүртэл 23 муурыг цэцэрлэгтээ оршуулжээ.

Като зуухаар ​​халаадаг агуулахдаа зэрлэгшсэн мууруудад зориулж хоол үлдээдэг. Тэрээр мөн Почи хэмээх нохойг тэжээх болсон байна. Түүний амьдардаг газар усан хангамжгүй болсон тул тэрээр ойролцоох уулын булгаас ус авч, нийтийн бие засах газар руу автомашинаараа явдаг аж. Түүний хоёр давхар модон байшин ч мөн хэцүүхэн байдалтай болсон байна.

Өдгөө 57 настай Сакаэ Като өмнө нь нэгэн жижиг барилгын бизнес эрхэлдэг байсан бөгөөд тэрээр орхигдсон байшингуудыг нураах ажилд тусалж байхдаа үхсэн тэжээвэр амьтдыг хараад, ихэд цочролд орсон бөгөөд улмаар үлдэхээр шийджээ. Түүний орхиж явж чадаагүй газраас 160 мянган хүн зугтан одсон юм.

Түүнчлэн мууруудын ачаар Като гурван үе дамжсан гэр бүлийнхээ эзэмшлийн газар дээр үлджээ. Тэрээр "Би явахыг хүсэхгүй байна. Би эдгээр уулны дэргэд амьдрах дуртай" хэмээн ярьжээ. Одоо түүний байшингийн ойролцоох тариалангийн талбайд ариутгал хийж байгаа бөгөөд удахгүй бусад оршин суугчдыг буцаж ирэхийг зөвшөөрөх юм.

Сакаэ Като сар бүр 7,000 ам.долларыг тэжээвэр амьтдад зориулж зарцуулдаг бөгөөд үүнийхээ зарим хэсгийг нар жаргах үед гэрийнх нь ойролцоо цуглардаг зэрлэг гахайнуудад хоол худалдаж авахад зарцуулдаг байна. Өнгөрсөн хоёрдугаар сарын 25-нд Катог Японы Засгийн газраас байрлуулсан хавханд баригдсан зэрлэг гахайг чөлөөлсөн хэрэгт сэжиглэн, баривчилжээ. Түүнийг одоог хүртэл байцаахаар цагдан хорьж байгаа аж.

Эх сурвалж: Reuters