АНУ-ын Коннектикут мужийн нэгэн эр хуучин эд хогшлын зах дээрээс ердөө 35 ам.доллароор худалдаж авсан жижиг аяга нь 15-р зууны Хятадын ховор олдвор болох нь тогтоогджээ.

Цагаан шаазан аягыг өнгөрсөн жил нэрээ нууцалсан эртний эдлэл сонирхогч олж авсан бөгөөд удалгүй шинжээчийн үнэлгээнд оруулсан байна. Мэргэжилтнүүд энэхүү аягыг 15-р зууны Мин улсын ховор эдлэл гэж тогтоосон бөгөөд 300-500 мянган ам.долларын үнэд хүрнэ гэж таамаглаж байгаа аж. Энэхүү ховор аягыг энэ сарын 17-ны өдөр Нью-Йорк хотод дуудлага худалдаагаар оруулахаар төлөвлөж байна.

Дэлхий дээр одоо ийм төрлийн долоон л аяга байгаа бөгөөд мэргэжилтнүүд энэхүү аягыг тэдний нэг гэж үзэж байгаа юм. Үлдсэн аягануудын ихэнх нь музейд байдаг. Энэхүү ховор аяга ямар замаар АНУ-д ирэн, хуучин эдлэлийн зах дээр худалдаалагдаж байсан нь нууц хэвээр байна.

Эх сурвалж: BBC

---