Энэтхэгийн ядуусын хорооллын иргэдэд туршилтын вакцин тарьсан байжээ

Энэтхэгийн төв хэсэгт орших Бхопал хотын ядуусын хорооллуудын зарим оршин суугчид коронавирусийн эсрэг вакцин тариулсан гэж бодсон ч яг үнэндээ эмнэлзүйн туршилтад оролцсон байжээ. 

Эдгээр ядуусын хороололд өнгөрсөн оны арванхоёрдугаар сард хэсэг бүлэг эмнэлгийн ажилчид ирэн, чанга яригчаар "Коронавирусийн эсрэг вакцинаа хийлгээд 750 рупи (10 ам.доллар) аваарай" хэмээн уриалсан байна. Ядуусын хорооллын иргэдийн хувьд 750 рупи нь нэг өдрийн орлогоос нь хоёр дахин их хэмжээ тул тэд уралдан вакцин тариулжээ.

Нөхрийнхөө хамт вакцин тариулсан Яшода Бай Ядав "Тэд бидэнд энэ бол коронавирусийн эсрэг вакцин гэж хэлээд, цар тахлаар өвчлөхгүй байхын тулд хийлгэх ёстой гэж хэлсэн" хэмээн ярьжээ.

Гэвч эдгээр оршин суугчид батлагдсан вакцин хийлгээгүй бөгөөд Энэтхэгийн "Covaxin" вакцины клиник туршилтад мэдэлгүйгээр оролцсон болохоо орон нутгийн идэвхтнүүдээс хожим олж мэдсэн байна. Үүнээс харахад "Covaxin" вакцины клиник туршилтыг гүйцэтгэж буй "People's Hospital"-ын эмнэлгийн баг өөрсдийгөө вакцины эмнэлзүйн туршилт хийж байгааг хангалттай тайлбарлаагүй гэж сэжиглэгдэж байгаа юм. Тус улсын клиник туршилтын дүрмийн дагуу бүх оролцогчоос зөвшөөрөл авах шаардлагатай билээ.

Вакциныг олон нийтэд тарьж эхлэхээс өмнө клиникийн туршилтын 3 дугаар үе шатыг дуусгах шаардлагатай билээ. Гэвч "Covaxin"-ы клиник туршилтын 3 дугаар шатны урьдчилсан дүн гарахаас өмнө Энэтхэгийн эрх баригчид тус вакцинд яаралтай хэрэглээний зөвшөөрөл олгосон юм. Ийнхүү "Covaxin" вакциныг өнгөрсөн нэгдүгээр сараас хязгаарлагдмал байдлаар хэрэглэж байгаа хэдий ч тус вакцины 3 дугаар шатны туршилт нь ирэх жил хүртэл дуусах төлөвгүй байгаа юм.

Эх сурвалж: CNN