Беларусийн шүүхээс Засгийн газрын эсрэг жагсаалд оролцсон нэгэн иргэнд 10 жилийн хорих ял оноожээ. Энэхүү шийдвэр нь Ерөнхийлөгч Александр Лукашенког засгийн эрхэнд байлгахын тулд эрх баригчдын үйлдсэн явуулга гэж сөрөг хүчний идэвхтнүүд үзэж байгаа юм.

Александр Кардзюков нь эсэргүүцлийн жагсаалыг тараахыг оролдож байсан аюулгүй байдлын хүчнийхэн рүү дайрсан гэх мэдээлэл байгаа бөгөөд үүнийхээ төлөө хүний аминд хүрэх гэж завдсан хэрэгт буруутгагдсан байна. Гэвч тэрээр гэм буруугаа үгүйсгэж байгаа юм. Орон нутгийн хэвлэлүүдийн мэдээлснээр Кардзюковыг жагсаалд оролцож байхад энгийн хувцастай хоёр аюулгүй байдлын алба хаагч түүнд буу тулгасан бөгөөд өөр нэг жагсагч Геннадий Шутауг хөнөөсөн байна.

Толгойдоо буудуулан амиа алдсан Шутау аюулгүй байдлын ажилтнууд руу халдсан хэрэгт буруутгагдсан бол түүнийг буудсан хүн нь хэргийн хохирогчоор тодорсон байна. Сөрөг хүчний удирдагч Светлана Тихановская "Тайван жагсагч Геннадий Шутауг өнгөрсөн наймдугаар сард энгийн хувцас өмссөн аюулгүй байдлын хүчнийхэн буудаж хөнөөсөн. Түүний найз Александр Кардзюков бол энэ хэргийн гэрч. Өнөөдөр шүүхээс Кардзюковд 10 жилийн хорих ял оноолоо" хэмээн өөрийн Твиттер хуудаснаа бичжээ.

НҮБ-ын хүний эрхийн дээд албан тушаалтан Мишель Бачелет өнгөрсөн пүрэв гарагт "Беларусьт урьд өмнө үзэгдээгүй хэмжээний хүний эрхийн хямрал болж байна" гэж анхааруулаад, энэ сарын 9-ний байдлаар тус улсын 246 иргэн улс төрийн холбоотой хэргээр хорих ял сонссон гэдгийг онцолсон байна.

Эх сурвалж: Reuters

---