LIVE: Т.Доржханд: Ерөнхийлөгч хариуцлага тооцох үйлдлийг өөрөө тавьчихлаа

Монгол улсын Ерөнхийлөгчийн тухай хуулийн зарим заалт Үндсэн хууль зөрчсөн гэх гомдлыг Үндсэн хуулийн цэц /ҮХЦ/-д гаргасантай нь холбогдуулж УИХ-ын гишүүн, ХҮН-ын дарга Т.Доржханд болон ХҮН-ын хуульч Д.Үүрцайх нартай ярилцлаа. 

УИХ-ын гишүүн, ХҮН-ын дарга Т.Доржханд: 

-Үндсэн хуулийн нэмэлт өөрчлөлт /ҮХНӨ/-өөр "Монгол улсын Ерөнхийлөгчийг нэг удаа, зургаан жилээр сонгоно" гэж зааж өгсөн. Гэтэл энэ заалтыг тойроод хуульчид болон улстөрчид маргаж эхэлсэн. УИХ-ын гишүүд ойлгохгүй байхад ард иргэд ойлгохгүй шүү дээ. Иймд УИХ эс үйлдлээрээ Үндсэн хууль зөрчлөө гэж үзэн хуульч Д.Үүрцайх бид хоёр ҮХЦ-д мэдээлэл гаргасан. 

Нэг зүйлийг онцолж хэлэхэд энэ мэдээлэл нь одоогийн Ерөнхийлөгч Х.Баттулгын тухай ч юм уу, түүнийг дахин нэр дэвшүүлэхгүй гэсэндээ хийсэн зүйл биш. 

-Цэцэд гомдол гаргасныг МАН-ын захиалгаар хийж байна гэж ярих хүн байна? 

-ХҮН-ыг анх байгуулагдахад тухайн үед сайд байсан, одоогийн Ерөнхийлөгч Х.Баттулгатай холбодог байлаа. Манайхыг санхүүжүүлж байна гэж. Дараа нь Ерөнхийлөгч асан Ц.Элбэгдоржтой холбодог байсан. Дараа нь Ерөнхий сайд асан С.Батболдтой холбон бичдэг болсон. Одоо МАН-тай хардаж, Ерөнхийлөгчийн эсрэг ажиллаж байна гэж тайлбарлаж байна. 

Нэг зүйлийг баттай хэлье. Манай намын ард хэн ч, ямар ч нам байхгүй. Бид бол сөрөг хүчин. Бид албан тушаал наймаалцдаггүй. ХҮН бол гуравдагч хүчин. Бид Үндсэн хуулийн суурь зарчмыг хамгаална. 

-Гэлээ гэхдээ Монгол улсын Ерөнхийлөгчийн Цэц дээр хоёр ч удаа очсон үйлдлийг юу гэж харж байна? 

-Энэ бол Үндсэн хуульд нөлөөлөх гэсэн үйлдэл. Өөрийнх нь асуудал яригдаж байна. Бага суудлын хуралдаан товлогдоод байна. Ерөнхийлөгч Цэцтэй уулзаж байгаа нь буруу. Цэцийн дарга хүлээн авч уулзаж байгаа нь буруу. Хариуцлага тооцох үйлдлийг Ерөнхийлөгч өөрөө тавьчихлаа. Ерөнхийлөгч гэдэг бие хүн биш, институт. Асуудал тавих гэж байгаа бол ажлын алба нь хандах ёстой. 

Хуульч Д.Үүрцайх: 

-Монгол улсын Ерөнхийлөгч Х.Баттулгыг нэр дэвшүүлэхгүй юмсан, Ерөнхийлөгчийн сонгуулийн өрсөлдөгчөө ХҮНам зайлуулж байна гэж ойлгож болохгүй. Хуулиа дээдэлдэг эрх зүйт төрд хууль тов тодорхой байх ёстой. Гэтэл тодорхойгүй болчихлоо. Энэ нь нийгэмд хагарал, хуваагдал үүсгэж байна.