Мэргэжлийн снукер билиардын шилдэг тоглогчдын аварга шалгаруулах тэмцээн шилдгүүдийн өрсөлдөөнөөр үргэлжлэн явагдаж байна.
11 дэх удаагаа зохион байгуулагдаж буй энэхүү тэмцээнд хоёр тамирчин л хошой аваргаар тодорсон байдаг нь домогт Ронни аварга болон Жадд Трамп нар юм. Жадд Трамп аварга эхний тойрогт Стуарт Бингхамд хожигдон тэмцээнээ дуусгаад байгаа бол Ронни О Суллиаван аварга шөвгийн наймд Жак Лисовскитэй хуваарийн дагуу өнөө шөнө /хоёрдугаар сарын 25-ны шөнө/ тоглоно. Жадд Трамп болон Стуарт Бингхам нарын ширүүн өрсөлдөөн бүхий тоглолтыг нөхөж үзэхийг хүсвэл ЭНД дарна уу.
Хэдхэн хоногийн өмнө Велсийн цомын тэмцээний финалд Ронни аваргыг хожин анхныхаа цомыг хүртсэн Жордан Брауны хувьд дэлхийн дөрвөн удаагийн аварга домогт Жон Хиггинс аваргатай учраа таарч 6:0 харьцаагаар хожигдон тэмцээнээ дуусгалаа. Тоглолтын дараа Жон Хиггинс: "Би үнэхээр сайн эхлэлийг тавилаа. Өрсөлдөгчөө дарамтад оруулж тоглоно гэсэн төлөвлөгөө маань биеллээ" хэмээсэн байна.
Харин тус бүр дэлхийн гурван удаагийн аварга Марк Селби, Марк Виллиамс нар 38 дахь удаагаа учраа тааран тоглолоо. Хамгийн сүүлд хэдхэн хоногийн өмнө "2021 Championship League" тэмцээнд учраа таарахад Марк Виллиамс хожиж байсан бол энэ удаад Марк Селби аваргын хожих ээлж ирсэн бололтой.
Ийнхүү ялалт байгуулсан Марк Селби, Жон Хиггинс аваргууд шөвгийн наймд маргааш буюу хоёрдугаар сарын 26-ны орой тоглох хуваарьтай байна.