Хоёрдугаар сарын 23-наас хойш иргэдээс "PCR" шинжилгээний бичиг шаардахгүй

Коронавирусийн нөхцөл байдлын талаарх /2021.02.20/11:00 цагийн ээлжит мэдээллийн үеэр хөл хорионы нөхцөл байдлын талаар тодруулав.

ЗГХЭГ-ын ХМХХ-ийн дарга Ц.Ганзориг: "Хоёрдугаар сарын 23-наас хойш эдийн засгаа чөлөөлөөд, иргэд эргээд энгийн амьдралын хэв маягтаа орно. Иргэдээс халдвар хамгааллын маш энгийн гурван дүрмийг л шаардана. Зай барьж, амны хаалтаа зүүн, гараа ариутгах. Мөн QR кодоо уншуулна.

Аж ахуй нэгж, төр дээр илүү их хариуцлага байна гэсэн үг. Эдийн засгаа аль болох суллах учир үйлдвэр, үзвэр үйлчилгээний газруудыг нээх болно. Өнөөдөр болох УОК-ын нэгдсэн хуралдаанаар гамшгийн зэргийг бууруулах асуудлыг хэлэлцэнэ.

23-ны өдрөөс хойш иргэдээс "PCR" шинжилгээний бичиг шаардахгүй.

Нийтийн тээвэрт 22 чиглэлд 210 автобус үйлчилж байгаа. Өчигдрийн 14:00 цагийн байдлаар 32,705 хүн нийтийн тээврээр зорчсон байна. Эдгээрийн 35 орчим хувь нь ахмад настан, хөгжлийн бэрхшээлтэй иргэд байсан. Магадгүй эмнэлгийн үйлчилгээ авахаар явсан байхыг үгүйсгэхгүй.

33 орчим хувь нь зөвшөөрөгдсөн 14 салбарын алба хаагчид байсан бол 2.9 хувь нь шалгагч нар байсан. Харин 7.2 хувь нь тодорхой зорилгогүй зорчиж байгаа иргэд гэдгийг хяналтын ажлын хэсгийнхэн тодруулсан байна. Иргэдийг хоёрдугаар сарын 23-ныг дуустал эрсдэлтэй хөдөлгөөн хийхгүй байхыг хүсэж байна. 

AstraZeneca вакцин эхний ээлжид орж ирнэ. Дараагаар нь Pfizer вакциныг авна. ДЭМБ-аас зөвшөөрсөн хоёр вакцин ийнхүү эхний ээлжид орж ирнэ. Дараагаар нь бусад сонголтууд шат дараалалтайгаар орж ирэх юм.

Улсын хэмжээн дэх вакцинжуулалт үнэ төлбөргүй хийгдэнэ. Харин хувийн хэвшлээр явагдах тохиолдолд зах зээлийн журмаар явна. Мөн дотоодын аж ахуй нэгжүүд эсвэл төрийн байгууллагууд зайлшгүй вакцин хийлгэсэн хүнд үйлчилнэ гэсэн журмыг Засгийн газар, УОК-оор огт хэлэлцээгүй гэдгийг онцолж байна" хэмээсэн юм.