Тува: Найман настай охиныг алах захиалга өгсөн эмэгтэйг баривчилжээ
ОХУ-ын Бүгд Найрамдах Тува Улсын цагдаагийн алба хаагчид болон Холбооны аюулгүй байдлын албаны ажилтнууд найман настай охиныг алах захиалга өгсөн эмэгтэйг баривчилжээ. Энэ тухай Дотоод хэргийн яамны бүс нутгийн хэвлэлийн алба мэдээлсэн юм.
Хэргийг тодруулбал, Кызыл хотын 61 настай оршин суугч эмэгтэй хоёр орон сууцны байр өвлөж авах зорилгоор бага насны хүүхдийн амийг хөнөөх хэргийг зохион байгуулах гэж байсныг албаныхан олж мэдсэн байна. Байрнуудыг тус эмэгтэйн нас барсан нөхөр нь эзэмшиж байсан бөгөөд өв залгамжлагч нь нөхрийнх нь найман настай охин аж.
Энэхүү эмэгтэй охиныг хөнөөх хүн хайж байсан бөгөөд аллагын хөлс болгож 180 мянган рубль буюу 6.9 сая төгрөг амласан байна. Ингээд цагдаагийн газрын ажилтан алуурчны дүр эсгэн, уг эмэгтэйтэй уулзжээ. Хэсэг хугацааны дараа тус эмэгтэй түүнд урьдчилгаа мөнгө болгож 10 мянган рубль өгөөд, охиныг хаана амьдардаг, хаана сурдаг, автобусны буудал дээр хэдэн цагт ирдэг болохыг нь зааж өгсөн байна. Тэрээр мөн гэмт хэргийг үйлдэх хэрэгсэл болох цахилгаан гүйдлээр цохигч бууг хүлээлгэн өгчээ.
"Алуурчин"-ы дүрд тоглосон цагдаагийн алба хаагч захиалгат аллагыг баталгаажуулахын тулд түүнд охины зураг болон малгайг нь үзүүлсэн байна. Харин дараагаар нь эмэгтэйг баривчилсан бөгөөд Мөрдөн байцаах хорооны албанаас түүнд "Гэмт хэрэг үйлдэхээр төлөвлөж, завдсан" болон "Хүн амины хэрэг"-ээр эрүүгийн хэрэг үүсгэжээ. Түүнд аль хэдийн ял оноосон бөгөөд шүүхээс түүнийг цагдан хорихыг тушаасан байна.
Эх сурвалж: Риа Новости
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.