Шинэ Зеланд руу 1,000 шахам кактус, шүүст ургамлыг хууль бусаар оруулах гэж завдсан хятад эмэгтэйд 12 сарын засан хүмүүжүүлэх хараа хяналт болон 100 цаг олон нийтийн ажил хийх ял оноожээ.

Венчинг Ли нь БНХАУ-аас Шинэ Зеланд руу ургамал авчрахыг оролдон, био аюулгүй байдлын тухай хуулийг хоёр удаагийн тохиолдлоор зөрчсөн гэм буруугаа өнгөрөгч лхагва гарагт болсон шүүх хурлын үеэр хүлээн зөвшөөрсөн байна. Тэрээр 2019 оны гуравдугаар сард 947 ширхэг кактус, шүүст ургамлыг хувцсандаа нуун, хил давуулахыг завджээ. Эдгээр ургамал нь 10,000 гаруй ам.долларын үнэтэй байсан бөгөөд тэдний дунд найман төрлийн устах аюулд орсон, ховордсон ургамал байсан аж.

Гэвч Лиг Оклендын олон улсын нисэх онгоцны буудалд ирэхэд үнэрч нохой түүний нууж явсан ургамлуудыг илрүүлсэн байна. Ингээд тэрээр нисэх буудлын ариун цэврийн өрөөнд хууль бусаар авчирсан ургамлуудаа хаях гэж оролдсон ч албаныхан арга хэмжээ авч, "Их хэмжээний ургамлын гаралтай материалыг хурааж авсан" хэмээн мэдэгдсэн юм.

Үүний дараагаар, 2019 оны долдугаар сард Венчинг Ли дахиад Шинэ Зеландын хилээр хууль бус ургамал оруулах гэж завдсан байна. Тэрээр ачаа тээшиндээ 142 ургамлын үр, 200 гаруй ургамлын сав нуусан байсан бөгөөд тэдний нэгэнд нь эмгэн хумс байжээ. Арилжааны өндөр үнэ цэнэтэй гэгддэг кактус болон шүүст ургамлуудыг Ли "TradeMe" цахим худалдааны платформ дээр зарж борлуулах зорилготой байсан гэнэ.

Эх сурвалж: The Guardian

---