Өмнөд Солонгосын Жансу хэсгийн ойн түймрийн байцаагчийн мэргэшлийн шалгалтад оролцож байсан 64 настай эрэгтэй өнгөрсөн сарын 29-ний өдөр биеийн хүчний шалгалт өгч байгаад нас баржээ.

Шалгалтад оролцогчид 15 кг жинтэй зөөврийн усны шахуургыг үүрээд, 1.2 км замыг 13 минутын дотор туулах ёстой байсан аж. Тус эрэгтэй ойролцоогоор 600 метрийн дараа ухаан алдаж унасан байна. Шалгалтад хяналт тавьж байсан түргэн тусламжийн ажилчид түүнийг орон нутгийн эмнэлэгт яаралтай хүргэсэн хэдий ч эрэгтэй нас баржээ.

Талийгаач 10 жилийн турш ойн түймрийн улирлын байцаагчаар ажиллаж байсан хэдий ч өнгөрсөн жил өөрчлөгдсөн дүрмийн улмаас анх удаа энэхүү шалгалтыг өгөх шаардлагатай болсон байна.

БНСУ-ын ойн түймрийн улирлын байцаагч нар өдөрт 69,800 воны цалин авдаг байна. Тус улсын Ойн алба ой хээрийн түймрээс урьдчилан сэргийлэх илүү сайн боловсон хүчнийг сонгох зорилгоор энэхүү биеийн хүчний шалгалтыг 2020 оны тавдугаар сараас хэрэгжүүлж эхэлсэн аж. Гэвч хэд хэдэн шалгалт өгөгч нас барсны дараа албаныхан гүйлтийн замын уртыг 2 км-ээс 1.2 км болгон багасгасан байна.

Өнгөрөгч аравдугаар сард Өмнөд Кёнсан мужийн Чангвон хотын 71 настай эрэгтэй шалгалтын үеэр нас барсан бол хэд хоногийн дараа Хойд Кёнсан мужийн Гунви тойргийн 59 настай эрэгтэй шалгалтын дараа амьсгалахад бэрхшээлтэй байсны улмаас нас баржээ.

Эх сурвалж: The Korea Times

---