Вьетнамын эрх баригч Коммунист намын Ерөнхий нарийн бичгийн дарга, Ерөнхийлөгч Нгуен Фу Чонг гурав дахь удаагаа улиран сонгогдож, дахиад таван жил төрийн эрх барихаар болжээ.

Тус намын дүрмийн дагуу намын дарга нь 65 нас хүрээд, эсвэл хоёр удаа улиран сонгогдоод албан тушаалаа хүлээлгэн өгөх ёстой хэдий ч энэ жил 76 настай Нгуен Фу Чонг ийнхүү гурав дахь удаагаа сонгогдсон байна. Ингэснээр тэрээр тус улсын сүүлийн хэдэн арван жилийн хамгийн хүчирхэг бөгөөд хамгийн удаан төрийн эрхийг барьсан удирдагчдын нэг болж байгаа юм.

Чонг Ханой хотод болсон намын Их хурлын үеэр намын Ерөнхий нарийн бичгийн даргаар улиран сонгогдсон бөгөөд улс орны өнцөг булан бүрээс ирсэн төлөөлөгчид хурлыг хаалттай хаалганы цаана хийжээ. Энэхүү Конгресс таван жилд нэг удаа болдог аж.

Вьетнамын Коммунист нам 100 орчим сая хүн амтай улсыг 45 гаруй жилийн турш удирдаж байгаа. Тус улсыг удирддаг гурван өндөрлөг нь Намын дарга, төрийн тэргүүнээр ажилладаг Ерөнхийлөгч болон Засгийн газрын тэргүүн Ерөнхий сайд юм. Нгуен Фу Чонг 2018 оноос хойш Намын дарга болон Ерөнхийлөгчийн албыг давхар хашиж байгаа билээ.

Ингээд коронавирусийн цар тахалтай амжилттай тэмцэж, эдийн засаг нь эрчимтэй хөгжиж буй Вьетнам улсын ирэх таван жилийн шийдвэрлэх үеийг Нгуен Фу Чонг чиглүүлэхээр болов. Тэрээр 2016 онд авлигын эсрэг "дайн" эхлүүлэн, олон өндөр албан тушаалтныг шоронд илгээснээрээ нэрд гарсан.

Эх сурвалж: BBC, The New York Times

---