Улаанбаатар ММС Энержи баг дэлхийн шилдгүүдтэй өрсөлдлөө

FIBA 3x3 сагсанбөмбөгийн энэ оны хамгийн сүүлийн тэмцээн болох World Tour Final тэмцээн Саудын Арабын Жеддах хотноо зохион байгуулагдлаа. 

Дэлхийн шилдэг 12 баг урилгаар оролцсон тус тэмцээн Ази тивийг төлөөлөн Улаанбаатар ММС Энержи баг анх удаа оролцсон юм. Тэмцээний ялагчаар дэлхийн чансааг тэргүүлэгч Латвийн Рига баг тодорч 60.000 ам.долларын шагнал хүртлээ. 

Манай баг А хэсэгт Сербийн хүчирхэг Лиман, UB багуудтай учраа таарч хэдий харамсалтайгаар ялагдал хүлээсэн ч тун сайн тоглолтыг үзүүллээ. 

Манай баг хэсгийн эхний тоглолтоо алдарт Лиман багтай хийсэн ба 20:16 харьцаагаар ялагдлаа. Улмаар хэсгийн сүүлийн тоглолтоо UB багтай хийж 21:16 харьцаагаар ялагдан тэмцээнээ дуусгасан юм. 

Аваргын төлөө Рига, Лиман багууд тун өрсөлдөөнтэй тоглолтыг үзүүлж 21:20 харьцаагаар Рига аваргын титмийг өргөлөө.