О.Амартүвшин АН-ын дарга болно

АН-ын даргын сунгаа энэ жилийн долдугаар сард эхэлсэн боловч, учир битүүлэг шалтгаанаар хойшлоод (угтаа зогсоод) байгаа. Ц.Оюунгэрэл, Л.Гантөмөр, Х.Тэмүүжин, О.Амартүвшин, О.Чулуунбилэг нар нэр дэвшихээ илэрхийлж байсныг уншигчид санаж буй. 

Эдгээр нэр дэвшигчид дотроос МҮХАҮТ-ын Ерөнхийлөгч О.Амартүвшинг АН-ын даргад тохирно гэж Монгол улсын Ерөнхийлөгч үзэж байгаа аж. Учир нь О.Амартүвшинг Монгол улсын Ерөнхийлөгч Х.Баттулга дэмжиж байгаагаа намынхнаасаа нуухгүй байгаа гэнэ.

Хоёр ерөнхийлөгч сүүлийн үед зүү орох зайгүй нөхөрлөж байгаа сурагтай. БНХАУ-д хандивлах 30 000 хонь гэдэг “галзуу” санааг О.Амартүвшин Ерөнхийлөгчид шивнэсэн гэдэг шивнээ яриа АН-ынхан дунд байна.

Цаашилбал, МҮХАҮТ, ЕТГ хамтран “Малчдад ээлтэй төр” төслийг хэрэгжүүлэн, онд орохгүй бог малыг 30 000 төгрөгөөр худалдан авах ажиллааг Баянхонгор аймгаас эхлэн зохион байгуулжээ. Бог малыг худалдан авахдаа урьдчилгаа 10 хувийг өгөөд, үлдсэн 90 хувийг зээлэх ба түүхий эдийг борлуулсны дараа зургаан сарын дотор төлж барагдуулахаар малчидтай тохиролцжээ. Энэхүү санааг мөн л О.Амартүвшин гаргасан гэх ба зуншлага тааруу, зуд болох нь тодорхой болсон Баянхонгор, Өвөрхангай, Говь-Алтай аймгийн малчид малаа дуртайяа өгнө гэж тооцсон нь байгаа оносон гэх юм билээ. Тэдний хоршил өнгөрсөн хугацаанд 30 000 толгой бог мал худалдан авчээ.

Гэхдээ энэ ажил анхнаасаа шулуун дардан байсангүй. “Баянхонгор аймагт хэдэн мянган мал худалдан авах нэрээр нэг дор цуглуулчихаад авахгүй байгаагаас бог мал ихээр хорогдож байна” гэсэн яриа хотод дуулдсан. Энэ мэдээллийн дагуу тодруулахад “Ачаа тээврээс болж мал худалдан авах ажиллагаа удааширч байна. Мал махаа авна. Санаа зоволтгүй” гэсэн тайлбарыг өгч байсан. Гэвч энэхүү ажил цар тахлын хөл хорионы улмаас гурван аймгаас хэтрэхгүй зогсжээ. Уг нь хоёр ерөнхийлөгч төслийг 21 аймагт хэрэгжүүлэхээр төлөвлөөд байсан гэдэг.

Нядалсан 30 000 малын арьс ширийг “Дархан арьс ширний цогцолбор” компани руу өгч, махыг “Мах импекс” зэрэг компанид борлуулсан гэнэ.

АН-ын дарга болох зам нь шулуудсан О.Амартүвшинд гэхдээ нэг болгоомжлох зүйл байгаа нь Их хурлаар өнөөдөр батламжлах үндсэн дүрмийн өөрчлөлтөөр Ерөнхийлөгчийн сонгуульд амжилтгүй оролцвол намын дарга автоматаар огцрохоор тусгасан. Тэгэхээр дөрөвдүгээр сард хуралдах дараагийн их хурлаар О.Амартүвшин намын тамга, тэдмгийг авлаа ч хоёр сарын дараа болох сонгуульд амжилтгүй оролцвол “хоёр сарын настай намын дарга” болж үлдэх аюултай.