Бид 800 ам.долларын үнэтэй лаа зардаг эрин үед амьдарч байна

Олон зууны турш лааг гэрэл гаргахад ашиглаж ирсэн ч аажимдаа баяр ёслолын үеэр гоёл чимэглэлийн зориулалтаар хэрэглэх болжээ. Орчин цагт лааны гүйцэтгэх үүрэг улам бүр нэмэгдэж тансаг хэрэглээнд зориулж эхэлсэн.

Орчны агаарыг цэвэршүүлэх, сайхан үнэртэй болгох, гоёж чимэглэх зэрэг олон зориулалтаар ашиглах тансаг хэрэглээний лааны зах зээл хүчээ авч байна. Америкийн лааны зах зээлд “Yankee Candle” 46 хувийг дангаараа эзэлжээ. Гоо сайхан, амралт сувилал, загварын салбарт гэх мэтээр лааны хэрэглээ төрөл зүйлээ нэмсээр байна.

Өнгөрсөн онд Америкийн зах зээлд 101,9 сая ам.долларын лаа зарагджээ. Тэр ч бүү хэл цүнх, гуталнаас ч үнэтэй лаанууд бий. Дэлхийн алдартай загварын агентлаг “Gucci” гэхэд л хоёр төрлийн лаа худалдаанд гаргасны нэг нь 300 ам.долларын үнэтэй, нөгөө нь 790 ам.долларын үнэтэй аж. Харин “Louis Vuitton” арьсан гар цүнх худалдаж авсан хэрэглэгчдэдээ 185 ам.долларын үнэтэй лаа санал болгож байна. Гоо сайхан, бие арчилгааны зах зээлд тансаг хэрэглээний лаа 60-80 ам.долларын үнэтэй.

Та бидний өдөр тутамдаа хэрэглэдэг Facebook, Instagram хуудсууд ч мөн лаа сурталчилж борлуулах хамгийн тохиромжтой цахим сүлжээ болжээ. Ая тухтай, өнгөлөг гэгээлэг орчин бүрдүүлэхийг хүсдэг хэрэглэгчид төрөл бүрийн лаа цуглуулж, гэрэл зургаа нийтэлснээр хүмүүсийн сонирхлыг татах нь бий.

Эх сурвалж: www.qz.com