Ковид-19 цар тахлын эдийн засаг, санхүүгийн зах зээлд нөлөөлж буй нөлөөллийн эсрэг улс орнуудын авч хэрэгжүүлж буй бодлогын арга хэмжээний талаар тойм мэдээллийг хүргэж байна. 

Цар тахлын хоёр дахь давалгаагаар ѳвчлѳл хурдтай нэмэгдэж, Евро бүсийн бизнесийн үйл ажиллагаа огцом буураад байна. Гэсэн хэдий ч КОВИД-19-ийн эсрэг вакцин гаргаж авахад ойрхон байгаа нь 2021 онд бүсийн эдийн засгийн сэргэх найдлага тѳрүүлж байна.

Өнгөрсөн сард 50 байсан Евро бүсийн PMI индекс 11 дүгээр сард 45.1 болж буурсан нь Reuters-ийн санал асуулгаас 1 пунктээр бага байна. Ингэснээр Евро бүсийн эдийн засаг 4 дүгээр улиралд их хэмжээгээр агших магадлал нэмэгдэж байна. Харин 2021 оны эхний хагаст вакцин гарах хүлээлттэй байгаа нь эдийн засаг ирэх оны 2 дугаар хагаст сэргэнэ гэх эерэг хүлээлтийг бий болгож байна.

АНУ-д КОВИД-19-ийн тархалт өндөр хэвээр байгаатай холбоотойгоор эдийн засгийн дарамт өндөр байна. 11 дүгээр сарын 20-ны долоо хоногт
ажилгүйдлийн тусламж хүсэгчдийн тоо хоёр долоо хоног дараалан өсч 778,000 болжээ. Энэ нь цар тахал эхлээд хэдийнээ 8 сар өнгөрсөн хэдий ч ажлын байрны цомхотгол үргэлжилсээр байгааг илтгэж байна. Хэрэглэгчид 10 дугаар сард зарлагаа ердөө 0.5%-иар нэмэгдүүлсэн нь цар тахлын дэгдэлт гарснаас хойших хамгийн сул өсөлт боллоо. Үүний зэрэгцээ орлого 10 дугаар сард 0.7 хувиар буурсан дүнтэй байна.

“Moody’s Analytics”-ийн ерөнхий эдийн засагч Марк Занди “Хэрэв ЗГ эдийн засгийг дэмжих төсвийн багц арга хэмжээнүүдээ зогсоовол эдийн засгийн байдал улам хүндэрнэ” гэжээ.

КОВИД-19-ийн эсрэг вакцин гарахад ойрхон байгаа нь найдвар төрүүлж байгаа хэдий ч дэлхийн эдийн засгийн сэргэлтэд бодит дэмжлэг болоход хугацаа шаардагдахаар байгааг ОУВС-ийн гүйцэтгэх захирал Кристалина Георгиева G20-ийн дээд хэмжээний уулзалтын өмнө анхаарууллаа.

Мөн санхүүгийн зах зээлд тогтворгүй байдал үүсэх эрсдэлтэйг анхаарууллаа. “КОВИД-19-ийн хямралаас үүдэлтэй эдийн засаг, нийгмийн эрүүл мэндийн тодорхойгүй байдалд улс орнуудын ЗГ-ууд цаашид ч бодлогын хүчтэй арга хэмжээнүүдийг авах шаардлагатай” гэж тэрээр ОУВС-ийн блогт (IMF Blog)-д нийтлэл бичжээ.

ОУВС 10 дугаар сарын “Дэлхийн эдийн засгийн төлөв” тайландаа дэлхийн эдийн засаг 2020 онд 4.4 хувиар агшиж, 2021 онд улс орнууд жигд бус сэргэснээр өсөлт 5.2 хувьтай байхаар тооцож байсан. Гэвч 2021 оны эцэст дэлхийн эдийн засаг цар тахлын өмнөх үеийн тѳсѳѳллѳѳс 6 хувиар бага түвшинд байхыг онцолжээ.

Тэрээр улс орнуудыг эдийн засгаа дэмжих төсвийн багц арга хэмжээнүүдээ цаашид үргэлжлүүлж, хамгийн ихээр цар тахлын хямралд өртсөн айл өрх, ажилчид, ААН-д үзүүлэх төсвийн дэмжлэгийг нэмэгдүүлэхийг уриаллаа. Мөн G20-ийн удирдагчдыг ядуу буурай орнуудын эдийн засгийн сэргэлтэд туслахад дэмжлэг үзүүлэхийг уриалав.

---