Индонезийн сайд нэг сая ам.долларын авлига авсан байжээ

Индонезийн Нийгмийн асуудал эрхэлсэн сайд Жулиари Батубара нь коронавирусийн цар тахлын гамшигт нэрвэгдсэн хүмүүст хоол хүнсний тусламж үзүүлэх ажлыг зохион байгуулахдаа хээл хахууль авсан хэрэгт буруутгагдаж байгаа аж. Түүнийг хүнсний тусламжийн нийлүүлэлтийг гүйцэтгэгч компаниудаас бэлэн мөнгө авсан гэж үзэж байгаа юм.

Тус улсын Авлигатай тэмцэх газрын ажилтнууд өнгөрөгч бямба гарагт хийсэн нэгжлэгийнхээ үеэр чемодан болон бусад газарт нуусан нийт 14.5 тэрбум гаруй Индонезийн рупи буюу нэг сая ам.долларыг олсон бөгөөд дөрвөн сэжигтнийг баривчилжээ. Харин ноён Жулиари ням гарагт сайн дураараа мэдүүлэг өгөхөөр ирсэн байна.

"Бэлэн мөнгийг долоон чемодан, гурван үүргэвч болон хэд хэдэн дугтуйнд хадгалсан байсан" гэж Авлигыг устгах хорооны дарга Фирли Бахури хэвлэлийн бага хурлын үеэр мэдэгдсэн юм. Албаныхны мэдээлснээр тэрээр хоёр гэрээлэгчийн нийлүүлсэн хүнсний боодол тутамд 10 мянган рупи буюу 0.71 ам.долларын ашиг олсон аж.

Хэрэв түүний гэм буруутай нь тогтоогдвол тэрээр 20 хүртэлх жилийн хорих ял авч магадгүй бөгөөд нэг тэрбум рупигийн торгууль төлөх хэрэгтэй болох юм. Харин баривчлагдсан сэжигтнүүдийн хоёр нь албан тушаалтан бол үлдсэн хоёр нь жирийн иргэн аж.

Тэгвэл тус улсын Ерөнхийлөгч Жоко Видодо ням гарагт хийсэн мэдэгдэлдээ сайд нарт авлигаас урьдчилан сэргийлэхийг удаа дараа анхааруулсан бөгөөд авлига авсан сайд нарыг хамгаалахгүй гэдгээ тэмдэглэсэн байна. Тэрээр "Энэ бол ард түмний мөнгө ... Энэ мөнгө Ковид-19-ийн цар тахлын үе болон эдийн засгийг сэргээхэд яаралтай хэрэгтэй байгаа" гэжээ.

Эх сурвалж: BBC