“Ковид-19” цар тахлаас үүдэн бүх нийтийн өндөржүүлсэн бэлэн байдлын зэрэгт шилжсэн энэ үед Монгол Улсын Шадар сайд, Улсын онцгой комиссын даргын тушаалаар байгуулсан улс хоорондын ачаа тээвэрлэлтийн үйл ажиллагааг нэгдсэн удирдлагаар хангах, тээвэрлэлтэд үүсч буй хүндрэл, саатлыг арилгах үүрэг бүхий Шуурхай бүлгийн цахим хурал өнөөдөр болов.

Зам, тээврийн хөгжлийн сайд Л.Халтарын удирдсан тус хуралд Зам, тээврийн хөгжлийн яам, Гадаад хэргийн яам, Хил хамгаалах ерөнхий газар, Гаалийн ерөнхий газар, Тээврийн цагдаагийн албаны төлөөлөл, аймгуудын Засаг дарга, Авто тээврийн төвийн дарга нар оролцож, улс хоорондын тээвэрлэлт, хилийн боомтын үйл ажиллагаанд үүсч буй хүндрэлийн талаарх мэдээлэл солилцож, шийдвэрлэх арга замыг тодорхойлж, холбогдох байгууллагуудтай хамтран шаардлагатай арга хэмжээг авч, зохицуулалт хийх шуурхай механизмыг хэрхэн бүрдүүлж буй талаар авч хэлэлцлээ.

Гадаад хэргийн яамны Хөрш орнуудын газрын захирал Т.Батцэцэг “Хятадын тал өөрсдийн хийсэн шинжилгээтэй жолооч авах тал дээр тууштай байна гэдгээ, мөн жолооч нарыг урьдчилж гаргаад шинжилгээ өгүүлэх боломжтой гэж мэдэгдсэн. Асуудлыг хоёр талын хилийн байгууллагууд хэлэлцэн шийдвэрлэх хэрэгтэй” гэсэн юм. 

АТҮТ-ийн Цогтцэций салбарын дарга С.Мөнх-Эрдэнэ “Өнгөрсөн сард Хятадын талд шинжилгээ хийлгэсэн 1500 орчим жолоочийн судалгааг гаргасан. Гашуунсухайт боомтоор шинжилгээтэй жолооч нарыг түрүүлж гаргахаар ажиллаж байгаа” хэмээв. 

Гаалийн ерөнхий газрын дэд дарга Б.Батхишиг “Шинжилгээ хийлгэсэн жолооч нарыг дараалал харгалзахгүй авахад бэлэн гэдгээ мэдэгдсэн. Ганц мод боомтод лаборатори маргаашаас ажиллаж эхэлнэ” гэлээ. 

Дорноговь аймгийн Засаг дарга О.Батжаргал “Эрээнд ажиллах 32  жолоочоос түргэвчилсэн шинжилгээ авч, тусгаарласан. УОК, ГХЯ жолооч оруулах асуудлыг яаралтай шийдэх хэрэгтэй байна”.

Шуурхай бүлгийн хурлын төгсгөлд Зам, тээврийн хөгжлийн сайд Л.Халтар:

-Замын-Үүдийн 32 жолоочийн шинжилгээ, тээврийн хэрэгслэл, хариуцаж байгаа албан тушаалтны мэдээллийг тодорхой болгож өгөх,

-БНХАУ-д үйлдвэрлэсэн PCR шинжилгээний аппаратыг ашиглан манайд хийсэн шинжилгээг Хятадын тал хүлээн зөвшөөрөх эсэх асуудлыг тодруулах,

-Автотээврийн үндэсний төв Ганц мод боомтод шинжилгээ хийлгэсэн жолооч нарын судалгааг ГЕГ-т гаргаж өгөх,

-Хятадын талд шинжилгээ хийлгэсэн 1500 жолоочийн тээвэр хийх явцыг тасралтгүй үргэлжлүүлэх,

-Монголын талд шинжилгээ хийлгэсэн ч хилээр гарч чадахгүй байгаа ачаатай жолооч нарын шинжилгээг Хятадын талтай зөвшилцөн чирэгдэл багатайгаар шуурхай өгүүлэх, зөвшөөрөлтэй, зөвшөөрөлгүй жолооч нарын дунд үл ойлголцол гарах, эмх замбараагүй байдал үүсэхээс сэргийлэх ажлыг Автотээврийн үндэсний төв, Өмнөговь аймгийн Автотээврийн төв, Цогтцэций сум дахь салбар, хил, гааль, цагдаа, онцгой комисстой хамтран зохион байгуулах чиглэл өглөө.

---