LIVE: А.Амбасэлмаа: Хэнтий аймагт коронавирусийн батлагдсан тохиолдол бүртгэгдээгүй

Эрүүл мэндийн яамнаас коронавирусийн нөхцөл байдлыг 17.00 цагийн байдлаар хүргэлээ.

ХӨСҮТ-ийн Тандалт судалгааны албаны дарга А.Амбасэлмаа: 11.00 цагаас хойш нийт голомтын ойрын хавьтлын 56 хүнд шинжилгээ хийхэд сөрөг гарлаа. Мөн Сэлэнгэ аймгийн батлагдсан тохиолдолд түргэвчилсэн шинжилгээ хийхэд мөн батлагдсан тохиолдол илрээгүй.

Манай улсад өглөөний 11:00 цагаас хойш нийт батлагдсан тохиолдол 17:00 цагийн хооронд нэмэгдээгүй. Нийт батлагдсан тохиолдол Улаанбаатар хотын хэмжээнд ес, ойрын хавьтал найм, олон улсын ачаа тээврийн жолоочийн ойрын хавьтлын тоо 73-аас 348 болж өссөн.

348 хүнээс 76 хүний шинжилгээг хийж байна. Хоёрдогч хавьтагч нарын 2000 гаруй хүний шинжилгээг хийх ёстой. Үүнээс 400 гаруй шинжилгээ үргэлжлэн хийгдэж байна. Нийт 348 ойрын хавьтлаас 272-т шинжилгээ хийсэн. Давтан шинжилгээний тоо нэмэгдэж хоёр дахь давтан шинжилгээг 45 хүнд хийсэн бол гурав дахь давтан шинжилгээг найман хүнд хийсэн.

Хэнтий аймагт коронавирусийн батлагдсан тохиолдол бүртгэгдлээ гэх мэдээлэл ирсэн.

Хэнтий аймагт хийсэн тандалтын сорьцоос гурван иргэний тест эерэг гарсан.  Эерэг гарсан тест болгон коронавирус халдварын батлагдсан тохиолдол болохгүй. Түргэвчилсэн тестээр онош тавихгүй, хуурамч эерэг, сөрөг гарах магадлалтай тул PCR хариу оношийг батална. Тухайн иргэдийг тусгаарлан сорьц авч харьяаллын дагуу Дорнод аймгийн лаборатори PCR шинжилгээ хийх бөгөөд хариу одоогоор гараагүй байна. Одоогоор Хэнтий аймагт коронавирусийн батлагдсан тохиолдол бүртгэгдээгүй гэдгийг албан ёсоор хэлж байна.