Өндөгний үнийг буулгахыг үүрэг болгов

Шударга өрсөлдөөн хэрэглэгчийн төлөө газраас Монгол Улсын Засгийн газрын 2020 оны арваннэгдүгээр сарын 11-ний өдрийн 178 дугаар тогтоол бүх нийтийн бэлэн байдлын зэрэгт шилжүүлсэнтэй холбогдуулан хүнсний бараа бүтээгдэхүүний хангамж, нийлүүлэлт, нөөц, үлдэгдлийн хөдөлгөөнд өдөр тутамд хяналт тавьж, нийлүүлэлтийн болон үнийн түвшинг тогтвортой байлгах, үнийн хөөрөгдөл, зохиомол хомсдол үүсгэх, хэт нөөцлөх, дамлан худалдаалахаас сэргийлэх арга хэмжээг авч ажиллаж байна.

Энэ хүрээнд өндөг үйлдвэрлэдэг томоохон аж ахуй нэгжүүдэд шаардлага хүргүүлэн, хариу арга хэмжээ авч ажиллаж байгаа аж. Тухайлбал,

"НВЦ трейдинг", "Түмэн шувуут" ХК-д Улсын байцаагчийн албан шаардлагыг арваннэгдүгээр сарын 14-нд хүргүүлжээ. Үүнд:

1. 2020.10.30-ны өдрийн "Бүтээгдэхүүний үнэд өөрчлөлт оруулах тухай" тушаалыг хүчингүй болгох.
2. Үнэ буулгасан талаарх мэдээллийг харилцагч болон олон нийтэд нэн даруй мэдээлэх.
3. Өндөгний түгээлтийг жигд хуваарилан дундын бөөний худалдаачдаар дамжуулахгүй, орон сууц, гэр хорооллын жижиг дэлгүүрүүдэд хүртээмжтэй түгээн, өндөгний үнийн хөөрөгдөл үүсгэхгүй байх.
4. Бараа бүтээгдэхүүнийг дамлан худалдаалахаас урьдчилан сэргийлэх зорилгоор нэг хүнд хэвийн хэмжээнээс хэт их хэмжээгээр болон бөөнөөр худалдаалахгүй байхыг харилцагч нартаа шаардаж ажиллах.
5. Өндөгний үнийн түвшинд тогтвортой байлгах.

Тэгвэл "НВЦ" ХХК дээрх албан шаардлагыг хүлээн авч, өндөгний үнийн өсөлтийн тушаалаа  хүчингүй болгожээ.