Дэлхий нийтээр тархсан ковид-19 халдварын энэ цаг үед цаг завгүй, ачаалалтай ажиллаж байгаа эмч мэргэжилтнүүд олон хоногоор гэртээ харилгүй иргэдээ эмчилж, халдварын голомтод олон сараар ажиллаж байна. Иймд эмч мэргэжилтнүүдээ төр бодлоор дэмжих хэрэгтэйг УИХ-ын дарга онцолж байна.

Энэ удаа улсын их хурлын дарга Занданшатар Халдварт өвчин судлалын үндэсний төвд гэр бүл болон найз нөхдийн зүгээс 20 сая төгрөгийн тусламжийг гардуулан өглөө.

Энэ үеэр улсын их хурлын дарга Занданшатар халдварын голомтод ажиллаж байгаа төрийн албан хаагчид, өвчтөнүүдийг эмчилж байгаа эмч мэргэжилтэн, эмнэлгийн ажилчдын нийгмийн асуудлыг шийдэхэд шат дараатай анхаарал хандуулах ажил цаашид ч үргэлжлэх болно гэдгийг тодотголоо. Мөн вирусийн халдвар авсан иргэдийн хувийн нууцад хүндэтгэлтэй хандахыг хүсэж байлаа. Их хурлын дарга энэ үеэр мөн хуулийн хэрэгжилтийг чангатгах, хууль хэрэгжүүлж ажиллахыг үүрэг болгосон юм.

---