БНСУ-ын био компани "GL Rapha" ОХУ-ын "Спутник V" коронавирусийн эсрэг вакцины олон улсын түгээлтийг хариуцаж, жилд 150 сая гаруй тунг үйлдвэрлэнэ гэж Оросын шууд хөрөнгө оруулалтын сангаас өнөөдөр мэдэгдэв.

Тус компани "Спутник V" вакциныг ирэх сараас Өмнөд Солонгост үйлдвэрлэж эхлэх гэнэ. Оросын шууд хөрөнгө оруулалтын сангаас гаргасан албан ёсны мэдэгдэлд "Талууд 2020 оны арванхоёрдугаар сараас үйлдвэрлэлээ эхлүүлж, 2021 оны нэгдүгээр сараас "Спутник V" вакциныг нэвтрүүлэхээр төлөвлөж байна" хэмээн тэмдэглэжээ.

Одоогоор БНСУ, Энэтхэг, Бразил, БНХАУ зэрэг 50 гаруй орноос "Спутник V" вакцины 1.2 тэрбум гаруй тунг захиалаад байгаа бөгөөд үүнээс 500 сая тунг нь олон улсын түншүүдтэй байгуулсан гэрээний дагуу ОХУ-аас гадна үйлдвэрлэх боломжтой гэдгийг тус сангийн албаныхан мэдэгдээд байсан юм.

Уг вакцины клиник туршилтын гуравдугаар үе шат үргэлжилж байгаа бөгөөд урьдчилсан судалгаагаар 92 хувийн үр дүнтэй гэж тогтоогдсон болохыг бид өмнө нь мэдээлсэн билээ.

Эх сурвалж: Yonhap News Agency

---