Я.Содбаатар: Алх, эсвэл автобусаар зорч

УОК-ын өчигдөр шөнө гаргасан “хатуу хөл хорионы дэглэм”-ийн тухай мэдэгдэл өнөөдөр өглөө олон хүнийг бухимдуулаад амжлаа. Бухимдал арилаагүй байгааг цахим орчинд өрнөж буй яриа хөөрөө хангалттай баталж байна.

УОК-оос хэвлэл мэдээлэл, шуудан зэрэг 13 чиглэлийн албан байгууллагын үйл ажиллагааг зөвшөөрч, бусдыг нь цахимаар ажиллах болон гэртээ байхыг үүрэгдсэн. Иргэд үүнийг чанд сахин биелүүлж байгаа гэж ойлгож байгаа.

Гэтэл өнөөдөр өглөө ажиллах зөвшөөрлийн ангилалд багтсан байгууллагын ажилтнуудын зарим нь автомашинтайгаа гарсан нь асуудал дагуулав. Тэднийг автомашинтайгаа зорчихгүй, зөвхөн автобусаар зорч гэсэн шаардлагыг цагдаагийн байгууллагаас тавилаа.

УОК-ын гаргасан логик уялдаа холбоогүй, зохион байгуулалтгүй бодлого, шийдвэр цагдаагийн албан хаагчдыг ч, жирийн иргэдийг ч паникт оруулчлаа. УОК-ын гаргасан шийдвэрээр бол нэг бол алх, нөгөө бол автобусаар зорч гэсэн үүрэг өгсөн хэмээн цагдаа нар шаардаж, иргэд “Автобусаар зорчих нь харин ч эрсдэлтэй шүү дээ” хэмээн сөргүүлэн бухимдлаа.

Шадар сайд Я.Содбаатар өчигдөр шөнө мэдэгдэл хийхдээ “алх, эсвэл нийтийн тээврээр зорч” гэж шууд хэлээгүй ч өнөөдөр тавьсан шаардлагууд ийм өнгө аястай байх юм.

Өнөөдөр ч яах вэ ингээд өнгөрлөө. Даваа гарагт бас энэ шаардлагаа тавих уу? Албан ажил руугаа явж буй иргэдээ автобусаар зорч гэж эрсдэл рүү шахсаар байх юм уу? Эсвэл, наадмын зөвшөөрөл шиг нэвтрэх цаас машиныхаа цонхонд наагаад явцгаах юм уу?

Гадаадад байгаа монголчууд “Хөл хориог ингэж хийдэггүй юм. Дэлхийн аль ч улсад ийм зүйл болоогүй” гэх. Тэдэнд итгэх үү? Эсвэл, Шадар сайдыг ажлаа сайжруул хэмээн шахсан нь дээр үү?