Сурагчдын өвлийн амралтын хугацааг наашлуулсан уу

2020-2021 оны хичээлийн жилийн сурагчдын амралтын хуваарийг БСШУЯ-аас өнгөрсөн тавдугаар сарын 20-нд баталсан. Сурагчдын нэгдүгээр улирлын амралтыг 1-12 дугаар ангийн бүх сурагч арванхоёрдугаар сарын 21-нээс 2021 оны хоёрдугаар сарын 1-нийг хүртэл нийтдээ 42 хоног амраахаар тов гаргаад байгаа юм.

Зарим хэвлэл мэдээллээр тус амралтыг цар тахлын нөхцөл байдлаас хамаарч хугацааг нь наашлуулж арванхоёрдугаар сарын 1-нээс эхлүүлэхээр болсон гэх мэдээлэл тараад байгаа бөгөөд тухайн мэдээлэл нь ор үндэсгүй худал мэдээлэл хэмээн БСШУЯ-аас мэдэгдлээ.

Сурагчдын амралтын хуваарь

Нэгдүгээр улирлын амралт:

1-12 дугаар ангийн бүх сурагч арванхоёрдугаар сарын 21-нээс 2021 оны хоёрдугаар сарын 1-нийг хүртэл амарна. Хоёрдугаар сарын 1-нээс хичээл орно.

Хоёрдугаар улирлын амралт:

1-12 дугаар ангийн бүх сурагч 2021 оны гуравдугаар сарын 29-нөөс долоо хоног амраад дөрөвдүгээр сарын 5-наас гуравдугаар улирлын хичээл орно.

Зуны амралт:

1-3 дугаар ангийнхан 2021 оны тавдугаар сарын 28-ныг дуустал хичээллээд зуны амралт эхлэх бол 4-5 дугаар ангийнхан 2021 оны зургаадугаар сарын 5-н хүртэл хичээллээд зуны амралт нь эхэлнэ.

6-12 ангийнхны хувьд 2021 оны тавдугаар сарын 31-нээс зургаадугаар сарын 4-н хүртэл шалгалтаа өгөөд амрах хуваарьтай байна.