Ерөнхий сайд У.Хүрэлсүх болон нийслэлийн Засаг дарга С.Батболд нарыг огцруулах асуудлыг УИХ, нийслэлийн төвшинд өнөөдөр хэлэлцэнэ.

Уг нь Засгийн тэргүүн, хотын удирдлага хоёрыг огцруулах асуудлыг өнгөрсөн баасан гарагт хэлэлцэхээр төлөвлөсөн ч тодорхой шалтгааны улмаас өнөөдрийг хүртэл хойшлуулаад байгаа юм. Тодруулбал, өнгөрсөн баасан гарагт нийслэлийн ИТХ дахь АН-ын бүлгийнхэн завсарлага авсан юм. Учир нь, тэд хотын даргыг огцруулах асуудлыг Ерөнхий сайд өөрөө танилцуулах ёстой гэж үзжээ.

Нийслэлийн Засаг дарга С.Батболдыг огцруулах шийдвэрийг МАН-ын Удирдах зөвлөлөөс гаргасан бөгөөд үүний дагуу Ерөнхий сайд У.Хүрэлсүх энэ сарын 27 буюу өнөөдрийн дотор асуудлыг хэлэлцэн шийдвэрлэхийг нийслэлийн ИТХ-ын дарга С.Амарсайханд үүрэг болгосон юм.

Түүнчлэн Ерөнхий сайд У.Хүрэлсүхийг огцруулахаар 27 гишүүн УИХ-д албан бичиг өгсөн. Хуулийн дагуу энэ асуудлыг УИХ-ын Төрийн байгуулалтын байнгын хороо долоо хоногийн дотор хэлэлцэх учиртай. Тиймээс өнгөрсөн баасан гарагт уг асуудлыг Байнгын хорооны хуралдаанаар хэлэлцэх байсан ч гишүүдийн ирц хүрээгүй билээ.

---