100 айлын барилгын материалын дэлгүүрүүдийг бүгдийг нь нүүлгэхгүй

Харин чулуу, төмрийн үйлдвэрийн үйл ажиллагаа явуулж байгаа аж ахуйн нэгжүүдийг суурьшлын бүсээс зайлшгүй нүүлгэнэ

100 айлын барилын материалын төвийг нүүлгэх ажлын хэсгийн ээлжит хуралдаан өнөөдөр боллоо. Уг уулзалтад худалдаа аж ахуйн эрхлэгчдийн төлөөлөл оролцсон юм. Тэдний зүгээс одоогийн байдлаар 145 дэлгүүр, 4500 орчим худалдаа эрхлэгч ажиллаж байна. Дээрх аж ахуйн нэгжүүдийн 90 хувь нь 9-100 төгрөгийн зээлтэй. Иймээс бид 100 айлаас нүүж чадахгүй хэмээн хурлын үеэр тэд мэдэгдсэн юм.

Харин ажлын хэсгийн зүгээс 100 айлын барилын материалын дэлгүүрүүдийг бүгдийг нь нүүлгэх асуудал яригдаагүй. Бага багаар 100 айлд бизнес эрхэлж байгаа иргэдийн нөхцөлийг сайжруулж, таатай орчинд ажиллах боломжоор хангаж өгөхөөр ажиллаж байна хэмээн тайлбарласан юм.

МХЕГ-ын дэд дарга С.Даваасүрэн “Мэргэжлийн хяналтын байгууллагаас ямар санал тавьж байгаа гэхээр өрхийн хэрэгцээнд ашиглана гэж газар авсан байтал тэндээ худалдаа, дэлгүүр, үйлдвэр ажиллуулж байгаа иргэдийг зориулалтын дагуу газраа ашигла гэж байгаа. Газрын тухай хуулиндаа хүртэл газраа зориултын бусаар ашиглах, эзэмшвэл хүчингүй болгоно гэж заасан байдаг. Газраа зориултын бусаар ашиглаж байгаа аж ахуйн нэгж, дэлгүүр, иргэдэд шаардлага тавьж байгаа юм. Бүх барилгын материалын дэлгүүрүүдийг нүүлгэх юм байна гэж ойлгож болохгүй. Харин чулуу, төмрийн үйлдвэрийн үйл ажиллагаа явуулж байгаа аж ахуйн нэгжүүдийг суурьшлын бүсээс зайлшгүй нүүлгэнэ. Энэ нь иргэдийн эрүүл аюулгүй орчны стандартын шаардлагад нийцэхгүй байгаа болохоор нүүлгэн шилжүүлэх юм” гэсэн юм.

Өнөөдрийн байдлаар 22 иргэн зориулалтын бусаар газраа ашиглаж байгаа бол үйлдвэр явуулж буй 37 аж ахуйн нэгж байна. Дээрх үйлдвэр болон агуулахыг Налайхын Үйлдвэр технологийн парк руу 2020 он гэхэд нүүлгэн шилжүүлэхээр төлөвлөж байгаа ажээ. Энэ ч хүрээнд Налайхын замаас Үйлдвэр технологийн парк руу явах 4.6 км бетон хучилттай замын ажил эхлээд явж байгаа гэнэ.