ХХААХҮ-ийн сайд Б.Батзоригийг сайдын албан тушаалаас нь огцруулах шийдвэрийг УИХ өнөөдөр гаргасан билээ. Харин УИХ-ын гишүүн Б.Батзоригийг УИХ-ын гишүүний бүрэн эрхээс нь түтгэлзүүлж, шалгах шаардлагатай байгаа тухай албан хүсэлтийг прокурорын байгууллагаас 11 сарын 5-ны өдөр УИХ-ын даргад хүргүүлсэн. Өнөөдөр үдээс хойш УИХ дахь МАН-ын бүлэг хуралдаж нэг гишүүнээ авч үлдэх үү, эс үлдэх үү гэдэг асуудлыг хэлэлцжээ. Эцэст нь олонхийн бүлэг прокурорын саналыг хүлээн авах боломжгүй гэсэн дүгнэлт гаргалаа.

 

УИХ дахь Хууль зүйн байнгын хорооны дарга Ш.Раднаасэд:
-Дэгийн процессийн дагуу одоо халдашгүй байдлын дэд хороо хуралдаж шийдвэрээ гаргасны дараа араас нь чуулганаар асуудлыг хэлэлцэнэ. ЖДҮ-ийг хөгжүүлэх сангийн зээл нь Б.Батзориг сайдын эрхлэх асуудлын хүрээнд хамаардаг учраас тэрээр ёс зүйн хариуцлагаа хүлээж сайдын албан тушаалаасаа татгалзсан. Сайд байхдаа энэ асуудлыг хамаардаг байсан бол одоо сайдын албан тушаалаа өгсөн учраас ЖДҮ хөгжүүлэх сангийн асуудалд оролцохооргүй болсон. Цаашид хөндлөнгөөс нөлөөлөх боломжгүй болсон учраас заавал УИХ-ын гишүүний бүрэн эрхийг түтгэлзүүлэх шаардлагагүйгээр шалгаад явах боломжтой гэж бүлэг үзлээ.

УИХ дахь МАН-ын бүлгийн дарга Д.Хаянхярваа:
-Б.Батзориг сайд эрхлэх асуудлынхаа хүрээнд алдаа гаргасан учраас албан тушаалаа өгч байна. Харин бусад зээл авсан сайд нар буюу Я.Содбаатар нарт намын зүгээс ёс зүйн хариуцлага тооцно. Ондоо багтааж авсан зээлээ төл, ард түмнээс уучлалт гуй гэж намын дарга хэлсэн. Гэхдээ зээл авахдаа хууль зөрчсөн үү, үгүй юу гэдгийг хууль хяналтын байгууллага шийдсэний дараа албан тушаалын асуудал яригдана. Хууль хяналтын байгууллага одоо шалгаад явж байгаа. Эцсийн шийдвэр гараад хууль зөрчсөн гэж үзвэл дараагийн асуудал яригдана.

 

---