Герман улсын хойд нутгийн эмнэлгүүдэд ажиллаж байсан 41 настай сувилагч Найлс Хоегел гэгч этгээдийг дор хаяж 100 өвчтөнөө санаатайгаар хордуулж, амь насыг нь бүрэлгэсэн хэрэгт буруутгаж байна.

Гэмт этгээд 1999-2005 оны хооронд зургаан жилийн хугацаанд Олденбург хотод 36, зэргэлдээх Делменхорст хотод 64 өвчтөнд жоронд бичигдээгүй хортой эм бэлдмэл өгч амь насанд нь хүрснийг илрүүлжээ.

Хэрэв түүний гэмт үйлдлийг шүүхээр нотолбол Дэлхийн хоёрдугаар дайнаас хойшхи хамгийн аймшигт цуврал аллагын гэмт хэрэг болох юм.

41 настай сувилагч Хоегелийг хамгийн анх 2005 онд Делменхорст хотын эмнэлгийн өвчтөнд жоронд бичигдээгүй эм өгсөн хэргээр баривчилж байжээ.

Хүн амины гэмт хэрэг үйлдэхийг завдсан хэрэгт буруутгаж долоон жилийн хорих ял оноосон байна.

2014-2015 онд Хоегел хоёр хүний аминд хүрч, мөн тооны хүн хороохыг завдсан хэрэгт холбогдож хоёр дахь удаагаа шүүгдэж, бүх насаар нь хорих ял оноожээ.

Гэмт хэргийг мөрдөгчид үргэлжлүүлэн шалгахад сувилагчийн өгсөн эмэнд хордож амиа алдсан зуу гаруй хүний хэрэг илэрсэн байна.

Аль хэдийн бүх насаараа хоригдох ял сонссон гэмт хэрэгтэн “хийсэн хэргээсээ хүлцэл өчье, хохирогчдын ар гэрийнхэн тайван байна гэдэгт найдаж байна” гэжээ.

Гэмт хэрэг үйлдэх болсон шалтгаанаа тайлбарлахдаа “ямар нэгэн сэдэл байхгүй, аяндаа л хийчихсэн” гэв.

Хохирогчдын ар гэрийнхэн Германы Эрүүл мэндийн яамыг хурцаар шүүмжлэн буруутгаж байна. Аймшигт хэрэг үйлдэгдэж байхад хариуцлагагүй, хараа хяналтгүй хандсан гэж үзжээ.

Эх сурвалж: www.bbc.com

---