"Amazon" онлайн худалдааны сайт дээр худалдаалагдаж байсан "Ковид-19" вирусийн хэлбэртэй Хэллоуины баг олон хүний шүүмжлэл дагуулсны дараа тус компани уг бүтээгдэхүүний худалдааг хориглохоор шийдвэрлэсэн байна.

Тод улаан өнгийн, инээмсэглэсэн царайтай энэхүү баг "Amazon" дээр 19 орчим ам.долларын үнээр зарагдаж байжээ. Багуудыг БНХАУ-ын Гуандун мужаас худалдаалж байсан аж.

Олон хүн уг Хэллоуины багийн үйлдвэрлэгчдийг үхлийн аюулт цар тахлыг хошигнол мэт болголоо хэмээн шүүмжилж байгаа юм. Одоог хүртэл дэлхий даяар нэг сая гаруй хүн коронавирусийн халдварын улмаас амиа алдаад байгаа билээ.

Их Британийн Өвчтөнүүдийн холбооны Гүйцэтгэх захирал Рэйчел Пауэр "Дийлэнх хүмүүс эдгээр багийг маш их тааламжгүй хүлээж авна гэдэгт би эргэлзэхгүй байна. Бас ийм багийг олон хүн өмсөхийг хүснэ гэж би төсөөлж ч чадахгүй байна" гэсэн юм.

Тэгвэл "Amazon"-ы хэвлэлийн төлөөлөгч энэ талаар албан ёсны мэдэгдэл хийн, "Бүх борлуулагчид манай борлуулалтын удирдамжийг дагаж мөрдөх ёстой бөгөөд үүнийг зөрчсөн тохиолдолд бид тэдний хуудсыг устгах арга хэмжээ ч авч болдог. Бид энэ бүтээгдэхүүнийг худалдаанаас хасаж байна" гэжээ.

Эх сурвалж: Metro

---