БНСУ-д амны хаалт зүүгээгүй хүнийг 100 мянган воноор торгоно
Өмнөд Солонгосын Засгийн газраас коронавирусийн цар тахлын эсрэг илүү сайн тэмцэх зорилгын хүрээнд ирэх арваннэгдүгээр сарын 13-наас эхлэн олон нийтийн газар амны хаалт зүүгээгүй хүмүүст торгууль ногдуулахаар болжээ.
Иргэд олон нийтийн тээврийн хэрэгсэл, жагсаал цуглаан, эмнэлгийн болон асрамжийн газруудад зайлшгүй амны хаалт зүүх хэрэгтэй гэдгийг тус улсын Халдварт өвчнийг хянах, урьдчилан сэргийлэх агентлагаас мэдээлсэн байна. Хэрэв иргэд эдгээр газруудад амны хаалт зүүгээгүй тохиолдолд тэднийг дээд тал нь 100 мянган вон буюу 246 мянга орчим төгрөгөөр торгох гэнэ.
Түүнчлэн амны хаалтыг хамар доороо зүүсэн гэх мэт шаардлага хангаагүй байдлаар зүүсэн хүмүүсийг ч торгох аж. Харин 14-өөс доош насны болон эрүүл мэндийн шалтгаанаар амны хаалт зүүх боломжгүй хүмүүсийг энэхүү шаардлагаас чөлөөлнө гэдгийг албаныхан мэдэгджээ.
БНСУ-д сүүлийн үед халдварын шинэ тохиолдол багасаж байгаа хэдий ч өнгөрсөн долоо хоногт тохиосон "Чүсок" ургацын баярын үеэр олон сая хүн орон даяар аялсан тул халдварын тоо эргээд огцом өсөж магадгүй юм. Тус улсад одоогийн байдлаар 24 мянга гаруй хүн цар тахлаар өвчилж, 400 гаруй хүн нас бараад байгаа билээ.
Эх сурвалж: Yonhap News Agency
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.