Италийн далайн эргээс элс авсан жуулчныг 1,200 доллароор торгожээ

Италийн Сардиниа арлаас хоёр кг орчим орон нутгийн элс тээшиндээ хийн, хил давуулахаар завдсан Францын жуулчин 1,000 евро буюу 1,200 ам.доллароор торгуулжээ.

Тус эрэгтэй энэ сарын 1-ний өдөр хуванцар саванд хоёр кг элс зөөвөрлөж явсныг "Cagliari Elmas" нисэх онгоцны буудлын албаныхан илрүүлж, түүнийг саатуулсан байна. Сардиниа арлын Байгаль хамгаалагчдын төлөөлөгч "Элстэй савыг хурааж авсан бөгөөд одоогоор бидний агуулахад байгаа. Жилийн эцэс гэхэд бидэнд маш олон савтай элс хуримтлагдсан байдаг" гэсэн юм.

Энэхүү арлын цагаан элсийг тусгай хамгаалалтад авсан байдаг бөгөөд элсийг далайн эргээс зөөвөрлөсөн жуулчдад торгууль ногдуулж, бүр шоронд хорих арга хэмжээ ч авдаг байна. Хэр их хэмжээний элсийг хаанаас авснаас хамаарч торгуулийн хэмжээ нь 600-3,550 ам.долларын хооронд хэлбэлздэг гэнэ.

Анх элс хулгайлах явдал хэт ихээр гарч байсан тул уг хуулийг баталж байжээ. Сардиниа арлын элс гайхалтай өнгө өнгийн байдаг агаад ягаан эсвэл цав цагаан элстэй эргүүдэд хулгай хамгийн их гардаг аж. Энэ талаар Байгаль хамгаалагчдын төлөөлөгч "Өнгөрсөн жил бид манай арлын элсийг бэлэг дурсгалын зүйл болгон зардаг вэбсайтыг илрүүлсэн. Энэ нь Европт маш түгээмэл үзэгдэл болсон" гэв.

Түүнчлэн арлын иргэд элс хулгайлж жуулчдыг харвал шууд эрх баригчдад ханддаг байна. Өнгөрсөн жил арлын цагдаа нар Францын нэгэн хосоос 40 кг элс хураан авч байжээ.

Эх сурвалж: CNN