Японы баруун өмнөд хэсэгт орших Кюшү арал өчигдөр Хайшен далайн хар салхины хүчтэй цохилтод өртөн, хоёр хүн амиа алдаж, дөрвөн хүн сураггүй алга болон, 100 гаруй хүн гэмтэж, бэртээд байгаа юм. Мөн арлын ихэнх хэсгээр тог тасарч, тээврийн хэрэгслийн хөдөлгөөнд ихээхэн саатал үүсэн, зарим үүрэн холбооны сүлжээнд доголдол гарсан байна.

Тодруулбал, Кагошима мужийн оршин суугч 70 орчим насны эмэгтэй нүүлгэн шилжүүлэх ажиллагааны үеэр гудамжны суваг руу унаад, эмнэлэгт хүргэгдсэний дараа нас барсан бол Сага мужид нэг эрэгтэй байшингийнхаа хоёр давхрын цонхыг бэхэлж байгаад унаж нас барсан гэж орон нутгийн эрх баригчид мэдээлэв.

Харин Миязаки мужийн Шийба тосгонд цагдаа нар 60 орчим насны эмэгтэй, түүний 30 орчим насны хүү болон барилгын пүүсийн оффисоос сураггүй алга болсон хоёр вьетнам ажилчдыг эрэн хайж байна. Түүнчлэн Ойта мужийн 40 орчим насны эрэгтэй гараашны дээврээсээ унан, гавлын ясаа гэмтээсэн бол Нагасаки мужид нүүлгэн шилжүүлэх төвийн цонх хагарсны улмаас дөрвөн хүн хөнгөн гэмтэл авсан аж.

Хайшен хар салхи тус улсаар дайран өнгөрөх үеэр бүс нутгийн 30 гаруй байршилд хамгийн хүчтэй салхины хэмжээ ажиглагдсан гэж цаг уурын агентлагаас мэдээлжээ. Нагасаки хотын Номозаки дүүрэгт даваа гарагийн үүрээр салхины хурд 213.84 км/цагт хүрч, дээд амжилт тогтоосон байна.

Эх сурвалж: Japan Today

---