Хэтэрхий их кокайн ачсан онгоц хөөрсөн даруйдаа осолджээ

Папуа Шинэ Гвиней улсаас Австрали хүрэхээр зэхэж байсан жижиг нисэх онгоц хөөрснийхөө дараахан осолдсон хэрэг өнгөрсөн долоо хоногт гарчээ. Уг ослын томоохон шалтгаан нь онгоцны тээшинд жин хэтрүүлэн ачсан их хэмжээний кокайн хар тамхи гэж мэргэжилтнүүд үзэж байна.

Ослын дараа орон нутгийн цагдаа нар хэсэгчлэн шатсан онгоцыг илрүүлсэн бөгөөд нисгэгч болон доторх ачаа нь байхгүй байжээ. Албаныхан удалгүй 28 цүнх бүхий нийт 500 кг кокайн олсон бөгөөд эдгээрийг уг бүтэлгүйтсэн нислэгтэй холбоотойг олж тогтоосон юм. Үүнээс хоёр хоногийн дараа осолдсон онгоцны нисгэгч болох Австралийн иргэнийг нь Папуа Шинэ Гвиней дэх Австралийн консулын газарт ирэхэд нь саатуулсан байна.

Харин Австралийн цагдаа нар Мельбурн хотод төвлөрсөн гэмт хэргийн томоохон бүлэглэлийн таван гишүүнийг уг хэрэгтэй холбон баривчилсан гэдгээ мэдэгджээ. Тэднийг Папуа Шинэ Гвинейгээс Австралийн Квинсланд муж руу 500 кг кокайн импортлохыг завдсан гэсэн хэрэгт буруутгаж байгаа юм. Хэрвээ сэжигтнүүдийн гэм буруутай нь шүүхээр тогтоогдвол тэд бүх насаараа хоригдоход хүрнэ.

Цагдаагийнхан сэжигтнүүдийг долдугаар сарын 26-ны өдөр "Cessna" загварын хөнгөн нисэх онгоцыг Квинсландын Марэба нисэх талбайгаас Папуа Шинэ Гвиней руу хууль бусаар нисгэсэн гэж үзэж байгаа юм. Мөн радарт харагдахгүйн тулд онгоц 900 орчим метрийн өндөрт ниссэн байна. Ийм төрлийн хууль бус, зөвшөөрөлгүй нислэгүүд нь бусад онгоц болон тухайн онгоцны зорчигч нарт аюултай байдаг аж.

Онгоцоор хил давуулах гэж байсан 500 кг кокайн нь нийт 80 сая ам.доллароор үнэлэгдэж байгаа бөгөөд энэ нь ойролцоогоор 500 мянган гудамжны наймаатай тэнцэх мөнгө юм.

Эх сурвалж: Fox News