Нинжагийн музейгээс нэг сая иен агуулсан сейф хулгайлжээ
Японы төв хэсгийн Миэ мужид байрлах Ига-рю нинжагийн музейгээс нэг сая иен буюу 26 сая гаруй төгрөгтэй тэнцэх бэлэн мөнгө агуулсан сейф хулгайд алдагдсан болохыг тус музейгээс мэдэгджээ.
Нинжа нарын алдарт Ига овгийн түүхийг харуулсан Ига-рю нинжагийн музейн оффисын аюулгүйн дохиолол өнгөрөгч даваа гарагийн 01:30 цагийн үед дуугарсан бөгөөд музейн удирдлагууд тэр даруй цагдаагийн байгууллагад мэдэгдсэн байна.
Цагдаа нар хэргийн газарт хэдэн минутын дараа ирэхэд музейн оффисын хаалгыг хүч хэрэглэн онгойлгосон байсан бөгөөд өрөөнд байсан сейф алга болсон байжээ. Аялал жуулчлалын алдартай цэг болох уг музей нь ням гарагийн 17:30 цагаас хойш эзэнгүй байсан гэнэ.
Бүх талаасаа 50 см-ийн хэмжээтэй уг дөрвөлжин сейф нь ойролцоогоор 150 кг жинтэй бөгөөд дотор нь өнгөрсөн амралтын өдрүүдэд 1100 орчим хүнээс цуглуулсан музейд нэвтрэх хураамж мөнгө байсан аж. Хулгайчид гуравхан минутын дотор музейд нэвтрэн, сейфийг аваад, ор мөргүй алга болсон хэмээн орон нутгийн хэвлэлүүд мэдээлж байгаа юм.
Албаныхан одоогоор хэрэгтнүүдийг илрүүлж чадаагүй байна.
Эх сурвалж: Japan Today
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.