Чехээс 25 хоног машинаар дайгдан ирсэн оюутныг хилээр нэвтрүүлжээ

Чех улсад сурдаг оюутан Н нь ОХУ-аар дамжин Монгол улсын хил дээр ирсэн ч түүнийг хилээр нэвтрүүлэхгүй байгаа талаар фейсбүүк хуудсаараа шууд дамжуулан мэдээлсэн билээ.

Тэрээр Чех улсад суралцдаг бөгөөд олон орон дамжин, 25 хоногийн турш автомашинд дайгдан долдугаар сарын 28-ны өдрийн 08:00 цагт Алтанбулаг хилийн боомт дээр ирсэн. ОХУ-ын хилээр нэвтэрсэн түүнийг Монгол Улсын хилээр нэвтрүүлэхгүй хэмээн, буцахыг шаардаад байсан юм.

Албаныхан түүнд "Тээврийн жолоочийг оруулж болно. Чи бол зорчигч. УОК-оос, Чехээс зөвшөөрөл аваагүй бол оруулахгүй" гэжээ. Харин Чех улсад суугаа Монгол Улсын Элчин сайд түүнд “Зөвшөөрөл авах шаардлагагүй. Бичиг баримтаа үзүүлээд л хилээр нэвтэрнэ” гэж хэлсэн гэнэ. 

Тэгвэл хоёр улсын хил дээр гацсан оюутан эмэгтэйг Монгол Улсын хилээр нэвтрүүлсэн болохыг албаны эх сурвалжууд хэллээ. Түүнийг өнөө өглөө/2020.07.30/ 09:00 цагт хилээр нэвтрүүлж, Сэлэнгэ аймагт тусгаарласан байна.