Хичээлийн шинэ жил хэзээ эхлэх талаарх шийдвэр энэ сарын 29-нд гарна

Коронавирусээс урьдчилан сэргийл эх өндөржүүлсэн байдлын хүрээнд хоёрдугаар сараас танхимын сургалтыг зогсоож, оюутнууд цахим, сурагчид болон цэцэрлэгийн хүүхдүүд теле хичээл үзэж, 2019- 2020 оны хичээлийн жилийг дуусгасан. Монгол Улс дотооддоо коронавирусийн тархалтгүй байгаа ч сарын дараа хичээлийн шинэ жил эхлэх эсэх нь тодорхойгүй байна. Энэ талаар БШУЯны холбогдох албаны хүнээс тодруулахад “Энэ хичээлийн жилийг есдүгээр сарын 1-нд эхлүүлэх зорилготойгоор манай яам бэлтгэл ажлаа хангаж байна. Өөрөөр хэлбэл, яамнаас УОК-т хичээлийн шинэ жилийг хэзээ, ямар хэлбэрээр эхлүүлэх талаар хүсэлт хүргүүлсэн.

УОКын шийдвэр энэ сарын 29-нд гарна. Хэдийгээр коронавирусийн халдварыг дотооддоо алдаагүй ч энэ сард дотоодын болон олон улсын нөхцөл байдал ямар байхаас шалтгаалан Засгийн газар, УОК-оос хичээлийн жил хэзээ эхлэхийг шийднэ. Энэ шийдвэрээр танхимын, цахим, эсвэл хосолсон хэлбэрээр хичээл орох эсэх тодорхой болох юм. Засгийн газрын шийдвэр гарсны дараа яамнаас холбогдох мэдээллийг албан ёсоор хүргэнэ. Эцэг, эхчүүд хичээлийн шинэ жилийг эрт эхлүүлэхийг хүсэх, цахим хичээлийг эсэргүүцэх нь шийдвэрт нөлөөлөхгүй. Эрүүл мэндийн болон холбогдох мэргэжлийн байгууллагаас нөхцөл байдалд тохирсон шийдвэр гаргана” гэсэн юм.